José Manuel Barroso

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


José Manuel Barroso.

José Manuel Durão Barroso (Lissabon, Portugal 23 miert 1956) (oetspraok [ʒo'ze mɐn'wɛl du'rɐ̃ bɐ'rosu]) is 'ne Portugese pollitikus en waor vaan 2004 bis 2014 d'n 11e prizzedent vaan de Europese Commissie, de regeringsinstèlling vaan de Europese Unie. Heer naom 't presidentssjap euver vaan de sociaoldemocraat (S&D) Romano Prodi. In 2014 woort Barroso vervaange door Jean-Claude Juncker. Wie zienen opvolger, zoe-ouch wie de allewijle prizzedeny vaan de Commissie Ursula von der Leyen, is Barroso lid vaan de christendemocratische Europese Volkspartij en de geällieerde Portegeese partij Partido Social Democrata (boe ouch de Nederlandse CDA, de Vlaomse CD&V, de Waolse CDH en de Duitse CDU en CSU aon zien geällieerd). Vaan 2002 bis 2004 waor heer premier vaan Portugal.

Barroso heet mierdere studies gedaon in Europa en zelfs in de VS. Heer heet op volgorde de volgende studies gedaon: Rechte in Lissabon, ikkonomische en sociale weitesjappe in Genève (Zwitserland) en doctorstitel in Washington D.C.. Heer woort al veur de Portugese Rivvelutie vaan 25 april 1974 aktief in de polletiek. Iers veur de Communistische Partij, daonao veur de PSD (Partido Social Democrata), 'n centraol-rechse partij boe heer nog ummertouw lid vaan is. Vaan 1985 tot 1987 waor heer Assistènt staotssecretaoris veur Binnelandse Zake. Daonao waor heer vief jaor laank, tot 1992, staotssecretaoris veur Boetelandse Zake. Heinao is heer drei jaor laank Minister vaan Boetelandse Zake gewees, um vaanaof 1995 'n lang tied gein speciaole titel te höbbe in de Portugese kamer. In 2002 woort heer evels premier vaan Portugal, um dit tot 2004 te blieve. Naodat de regering vaan Portugal in 2004 waor gevalle, woort heer bij de EU veurgestèld es nuije prizzedent vaan de EC. Heer woort good gekeurd door de mierderheid. In 2009 woort heer veur 'n twiede amb gestump: 382 veur, 219 tege, 117 neutraol. Barroso is getrouwd en heet drei kinder.

Prizzedentssjap vaan de Europees Kemissie[bewirk | brón bewèrke]

Barroso woort op 29 juni 2004 veurgedrage es nuie prizzedent vaan de Europees Kemissie, kort nao de Europese verkiezinge. Zien kandidatuur woort op 20 juli 2004 door 't nui Europees Parlemint goodgekäörd. Op 12 augustus maakde Barroso de lede vaan zien Kemissie bekènd. Die koste evels neet allemaol op eveväöl instömming reikene vaan 't Parlemint. Zoe goof 't väöl kritiek op de conservatieve Italiaan Rocco Buttiglione, dee 't Kemmissarissjap veur Zjustitie, Vrieheid en Veilegheid op ziech zou nömme. Heer woort veural bekritiseerd umwille vaan zien opvattinge euver homo's en vrouwlui. De Lètse Ingride Udre kraog ouch neet genog steun um Eurokemissaris veur Belesting- en Douaneunie te weure. D'n Hongaar Lázló Kovács, dee Eurokemissaris veur Energie zou motte weure, kraog zjus wie Udre de kritiek vaan 't Parlemint meh wieneg te weite vaan 't oonderwerp. Wie 't d'r op leek tot 'n mierderheid vaan 't Parlemeint daorum contra de Kemissie zou stömme, besloot Barroso op 27 oktober 2004 aon 't Parlemint oetstèl te vraoge veur 't aontreje vaan zien Kemissie.

Op 4 november 2004 prizzentierde Barrose 'n twiede samestèlling vaan de Kemissie. Veur de Eurokemissaris veur Zjustitie, Vrieheid en Veilegheid woort Buttiglione vervaange mèt d'n toenmaolegen Italiaanse minister vaan Boetelandse Affaires: Franco Frattini. D'n ierder geneumde Kovács kraog Belesting en Douane, boe-in heer 't Parlemint wel leek te euvertuige genog te weite. Veur Energie woort 't 'ne nuie Lètse kandidaot: Andris Piebalgs.

Dees samestèlling woort wél aonveerd door 't Parlemint. Vaanaof 22 november 2004 moch Barroso ziech prizzedent vaan de Europees Kemissie neume.

Op 8 juni 2005 stömde 'n mierderheid vaan 't Parlemint contra 'n veurweerdeleke motie vaan wantrouwe tege Barroso, die door 't Eurosceptische en nationalistische Europarlemintslid Nigel Farage waor ingedeend vaanwege 'n verkantie die Barroso aon boord vaan 'n jach vaan 'ne Griekse sjeepsmagnaot had doorgebrach. Ein week later oontving datzelfde bedrief steun vaan de Kemissie te weerde vaan mie es 10 mieljoon euro. De boettoch bleek evels plaots te höbbe gevoonde veurtot Barroso zienen ambt aonveerde en de steunmaotreigel waor al goodgekäörd door de vörrege Europees Kemissie. De oetslaag vaan de stömming waor 589 contra, 35 veur, 35 oonthawwing.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=José_Manuel_Barroso&oldid=449713"