Genesis

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.



Dit artikel geit euver 't biebelbook Genesis. Veur de rockgroop Genesis zuug Genesis (band)

Genesis is 't ierste vaan al Biebelbeuk en behuurt (in christeleke terme) tot de Pentateuch en (in joedse terme) tot de Thora. 't Kump vaan 't Griekse woord Γένεσις, wat "weuring", "oontstoon" beteikent. Op 't Hebreeuws hèt 't book בראשׁית. 't Besjrief de groetendeils mythische historie vaanaof de sjöpping vaan de Eerd tot d'n doed vaan Joezep.

Samevatting[bewirk | brontekst bewerken]

De ciefers verwieze nao de hoofstökker boe-in 't geneumde gebäört.

God sjöp in zes daog de Eerd (1) en zèt de mins in d'n Hoof vaan Eden (2). Door de zoondeval weure ze oet 't paradies verdreve (3). Nowee is 'ne wije naokoumeling (4, 5), dee vaan God de opdrach krijg veur 'n aark te bouwe um alle bieste in mèt te numme (6, 7). Nao de zoondvlood (7, 8) zwerme alle bieste en Nowee en zien vrouw oet euver de Eerd (9). Daan volg 'n euverziech vaan Nowee zien naogeslach (10). Door de taole vaan de minsheid te verstruie zörg God tot de Torie vaan Babel neet veerdeg kump (11).

Vaan 12 t/m 15 weurt Abraham zie vreug leve weergegeve. Umtot zien vrouw Sara gein kinder krijg, verwek heer eint, Ismaël, bij Hagar, 'n slavin (16). Abraham slut e verboond mèt God (17) en de Hier vertèlt häöm euver Sodom en Gomorra; Heer wèlt de stei goon verweuste (18). Heer liet Lot, broor vaan Abraham, oet Sodom wegtrèkke en verweus daan de bei stei (19). Nao de bepreuving vaan keuning Abimelech (20) krijg Sara 'ne zoon, Izaäk (21). Later bepreuf God Abraham door häöm te vraoge Izaäk te offere (22). Sara störf (23) en Izaäk trojt mèt Rebecca (24). Abraham hertrojt mèt Ketura en störf daan ouch. Izaäk krijg twie zäöns, Jacob en Ezau (25). Izaäk en Rebecca trèkke nao Gerar en tösse Jacob en Ezau oontsteit vreigel (26). Kort voor zienen doed zegent Izaäk Jacob (27, 28). Jacob geit nao Laban en trojt dee zien dochters Lea en Rachel (29), die häöm 'ne zoon, Joezep gief. Jacob trèk weer trök nao zien geboorteland (30, 31) en tröf dao zie broor Ezau (32, 33). Al vreis heer 't ergste, Ezau bliek häöm te höbbe vergeve. Jacob zien dochter Dina weurt verkrach door Sichem, dee häör es vrouw wèlt. Häör breurs Simeon en Levi vermaore Sichem (34). Jakob trèk weer nao Betel (35). Book 36 vertèlt euver 't naogeslach vaan Ezau. Daan weurt Joezep es slaof nao Egypte gebrach, meh ziene pa en breurs meine tot heer vermaord is. Nao 'n oetweiing euver Juda en zien sjoendochter Tamar weurt vertèld wie de vrouw vaan Potifar Joezep vergeefs perbeert te verleie. Zie drejt de zaak evels um en zoe kump Joezep in de gevangenis (39). In de gevangenis lègk Joezep aon twie collega-gevangene hun druime oet (40). Wienie de farao daovaan huurt, liet heer Joezep bij ziech rope um zienen eige droum oet te lègke (41). Zoe weit Joezep tot invloodrieke maan aon 't hoof vaan de farao op te klumme. Oonderwijl is in Kanaän hongersnoed, zoetot Jacob zien zäöns nao Egypte sjik um graon (42). Es dat op is sjik heer ze nog ins (43), en ze kloppe deeskier bij Joezep aon, dee ze herkint en riekelek vaan graon veurzuut (44). Es Joezep ziech aon zien breurs (die häöm nog altied doed meine) bekindgemaak heet (45) kump Jakob mèt al zien zäöns euver nao Egypte (46, 47), boe dee ouch störf (47 t/m 50). Mèt d'n doed vaan Joezep (50) indeg 't book.

Externe link[bewirk | brontekst bewerken]


Biebel: Aajd Testamint - Nui Testamint
Genesis | Exodus | Leviticus | Numeri | Deuteronomium | Jozua | Riechters | Ruth | 1Samuel | 2Samuel | 1Keuninge | 2Keuninge | 1Kronieke | 2Kronieke | Ezra | Nehemia | Esther | Job | Psame | Spräöke | Prediker | Kantieke | Jesaja | Jeremias | Lamentaties | Ezechiël | Daniël | Hosea | Joël | Amos | Obadias | Jonas | Micha | Nahum | Habakuk | Sefania | Haggai | Zacharias | Maleachi

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Genesis&oldid=343745"