Zuzaote

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

---

Zuzaote is eine neet besjtaonde plaatsjnaam dae in sómmige Limburgse dialekte wirt gebruuk in sjpraekwoordelikke zin, biejveurbeeld es me zaet: "Dae kump van Zuzaote" wat beteikent Dae wit van toete noch blaoze. De naam duik veur 't eësj op in 1843 in Den Opregten Antwerpschen Almanak wo-in wirt gesjpraoke euver "Ig bin van Susaute gebortig" wat beteikent dat 'r dóm is want Susaute wirt besjtempeld es ein achterlik dörp.

Volges de De diksjenaer van 't Mestreechs van H.J.E. Endepols oet 1955 wirt Zuzaote allein gebruuk in de oetdrökking heer kump van Zuzaote wat beteikent hae wit nurges van, hae is dóm. Mèt Zuzaote wirt hiej 't neet besjtaond plaetske Susaeten in de Belzje Kempe bedoeld.

Allewiel is 't gebruuk van de naam meë oetgebreijd want me zaet noe ouch waal èns Loup mèr nao Zuzaote of te waal angesj gezag loup nao de pómp. En sóms wirt ouch waal gezag ich bèn vandaag nao Zuzaote en daomèt geuf dae persoan dan te kènne dat hae zien bedoelinge neet kènbaar wilt make.

Euveriges kump de naam ouch veur in ènnige vastelaovesleedjes zoaes in Zjuulke zeuthout van Ziesjoem! en in Roed, geel en greun van Frans Theunisz.

In Kèrkrao kalt me in dezelfde conteks van Mukkebummele of Bummelebeëke. E Nederlandjs synoniem veur Zuzaote zouw Nergenshuizen kènne zeen.