Waw (Hebreeuws alfabet)
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
De waw, vav of vau is de zèsde lètter oet 't Hebreeuws alfabet. De lètter waw wert es medekleenker oetgesjpraoëke es 'n w of v. Es laesmam kan de lètter d'r /oe/- of /o/-klaank aa-gaeve.
In modern transliteraties wert de lètter mètstens es V gesjraeve. Daarvör is d'r internationaal bekèndere naam Vav wellich toepasseleker. In 't Germaans taalgebied is d'r klaank die de Vav/Waw aa-gèft neet precies 'ne /V/, mae ooch neet precies 'ne /W/-klank. In 't Ingelsj wert e es /V/ gesjraeve, in 't Nederlands wisselend es /V/ of es /W/.
De lètters van 't Hebreeuws alfabet kaome ooch överèè mèt ciefers, de waw is de Hebreeuwse zès. Öm groeëte getalle óp te sjrieve werre de Hebreeuwse ciefers bie de tientalle of hoonderdtalle ópgeteld, oeënao ze werre ópgesjraeve. Vör de waw gèft 't 'n oetzoondering bie 't getal zaestieën. Dit wert neet gevörmd dör 10+6, ömdat aandersj de heilige combinaties van d'r naam van God JHWH kan oontsjtoeë. 't Getal zaestieën wert gesjraeve es: טז (9+7).
't Waoërd waw betekent haok. De lètter haat dan ooch, zieëker in de oorsjpronkeleke paleo-hebreeuwse vörm - die óp 't fenicisch geliekt, de vörm van 'ne haok.
De waw keumt beväörbeeld vör in d'r Hebreeuwse naam Emmanuël dae dan ooch oetgesjpraoëke zow kènne werre es Emanoeël: עמנואל.