Van Gelder

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.


Van Gelder Bandlogo

Van Gelder is ein Venlose dialekband, opgerich medio 2009.

Historie[bewirk | brón bewèrke]

Van Gelder is medio 2009 óntstaon op initiatief van Chris Thenu. Chris, bekind van o.a. de Venlose band Blauw en d'n "evergreen" Veur altièd 'ne Venlonaer , "verzamelde" jónge talente um zich haer, o.a. aafkómstig van de Herfshane. Dees talente umvatte neet allein de bandleje maar ouk de teksdichters Sadie Peeters en Laura Hillebrandt, Leech- en Geluùdstechnicus Lars Hocks, fotograaf Thom Spierenburgh en de studente aan de Kunsacademie Emmy Cleophas. Op dees wies kriege jóngeluuj de kans zich te manifestere en profilere in eur eige specialiteit en gezamelik Van Gelder ein eige smoel te gaeve.

Ind 2009 is via Hyves eine wedstrièd gehalde um de band (toen nog: Venlose Band Nog Zónder Naam) eure naam te gaeve. Dit woord oétintellik Van Gelder, verwièzend nao d'n Hertog van Gelder, de man dae Venlo in 1343 stadsrechte goof.

In december 2009 had Van Gelder eur iërste eige nummer klaor, getiteld "Zóndaag". Dit nummer woord veur 't iërs publiekelik gespeuld in ein akoestische versie beej Umroop Venlo. Nao aanleiding van dit optraeje woord Van Gelder genuuejd veur 't Glaze Hoes. 't Belke waas aan 't rolle gekóme, vervolgoptraejes tiejes o.a. de Boetegewoeëne Boetezitting in 2010 ware ein feit. Drék nao de vastelaovend is Van Gelder begós met 't schrieve van tekste en mezièk veur eur ierste CD. Dees CD, getiteld "Enigma" is op 5 september 2010 gepresenteerd. Op 18 September 2010 haet Van Gelder deilgenaome aan de Nach van 't Limburgse Leed.

Van Gelder

Begin oktober 2010 wuuërd Van Gelder's CD Enigma oètverkore tot 't "Geluid van Zuid" beej 't radioprogramma Plat Eweg van L1. Tegeliekertied wuuërd 't nummer Vergaef Mich as #11 (TIP) geplaats in de L1mbo Top 10 van oktober 2010.

In augustus 2011 neme de band en Bart Janssen afschied vanein. Bart's plaats wuuërd ingenaome door Ron Dings. De nieje single en videoclip "Diene lach" wuuërd op 2 december 2011 gepresenteerd beej Umroop Venlo en Maasland Radio. Initiatiefnemer Chris mak ruúmte veur eine jónge opvolger. Dit wuuërd Jop Janssen oét Leunen. In dees definitieve samestelling, met Chris as coach werkend op d'n achtergrónd, waere nieje stappe gezatte op muzikaal vlaak. In 't veurjaor van 2012 wuuërd gestart met 't schriéve van nieje nummers. Heejvan waere der in oktober 2012 ein aantal opgenaome in de beroemde DMI Record studio's in Weesp.

De 4e single van de band, "Kwietwaeg" wuuërd op 18 oktober 2012, perciés dreej jaor nao de oprichting, oétgebrach en wuuërd op L1 tot "Plat Du Jour" oétgeroope.

Niels Timmermans vervingk Jop dae zich stort op zien meziékschoeël in Leunen.

In de zomer 2013 wuuërd eine oproop gedaon um mei te schrieve aan extra coupletjes veur 't leedje "Bin d'r beej" (#BndrB) um zoeë 't Langste Limburgse Leed te make. Dees recordpoging wuuërd oétgevoerd tiejes de Nach van 't Limburgse Leed in 2013. Met dees recordpoging zinge o.a. Burgemeester Antoin Scholten, Rens Flos, Kristel Roulaux, Jeroen van den Ham, Bram Holla, Leta Bell en Sef Thissen mei. De lange versie is met dees zengers toegevoek as extra nummer op 't album "Ónderwaeg".

In november 2013 wuuërd 't album "Ónderwaeg" geprissenteerd in de nieje Frans Boermanszaal in theater De Maaspoort. Nestor Chris Thenu en gast-zenger Antoin Scholten kriege de iërste exemplare euverhandig tiejes ein aovendvöllend programma. 't Titelnummer Ónderwaeg is ein duet met Kristel Roulaux. Dit nummer wuuërd as single oétgebrach en wuuërd Plat Du Jour op L1 radio. 't Album wuuërd "Het geluid van Zuid" op radiozender L1/Plat-e-weg.

In de zomer van 2014 waere in de Klank studio's diverse nieje nummers opgenaome. Op 't nummer #NDRS wuuërd de band versterk door striékers van Het Gelders Orkest. Dit nummer wuuërd begin 2015 as single, veurzeen van video-clip gelanceerd.

In november 2014 werk Van Gelder same met de Venlose bands Minsekinder, Appelemoos, Kwante Hippe en Linke Mik aan 't project "Venloos Blood". Dit initiatief van Minsekinder en poppodium Grenswerk wuuërd tiejes ein Bootcamp en inkele studio-sessie opgenaome in ein studio in Panningen. De CD "Venloos Blood" zuut op 16 jannewari 2015 't leech in Poppodium Grenswerk.

In juni 2015 schriéf Ron, oétgedaag door de DJ's van Omroep Venlo, ein Venlose teks op de hit "Parijs" van Kenny-B. Dit bliek de 1e Limburgse versie van dit leedje te zien en wuuërd doezende kiere bekeke op youtube. 't Leedje geit o.a. euver 't declareergedraag van politiek leiders maar veural euver de släötjesbrök (Pont des Arts) in Paries. Kastelein Louis Klaassen wis 't Venlose gemeintebestuur te bewaege eine breef te schrieve nao d'n Börgervader van Peries um dees brök nao Venlo te verhoéze.

Op 4 juli 2015 prissenteert de band eure single "Blieve Gaon" met eine biezóndere, zomerse, videoclip. Dees clip is in Venlo, Mestreech, Kölle en Maasbree opgenaome, en veurzeen van teikeninge van de bekinde Venlose teikenaer Leon Peeters. Zoewaal de single en de clip waere metein good opgepak. L1 lanceert 't leedje tot "Plat du Jour.

Bendleje[bewirk | brón bewèrke]

  • Ron Dings - Zang & Gitaar
  • Luc Faassen - Toetse & Zang
  • Mark Verhaegh - Gitaar & Zang
  • Tommy Schouren - Drums & Percussie
  • Nico Pieck - Bas

Mezièkstiel[bewirk | brón bewèrke]

CD Hoes Van Gelder

Van Gelder speult veurnamelik eige werk, veurzeen van tekste in ´t Venloos dialek. De stiel varieert van ballads tot stevige pop.

Discografie[bewirk | brón bewèrke]

  • 2010 - Vergaef Mich (Single)
  • 2010 - ENIGMA (Album)
  • 2010 - Zóndaag (Single)
  • 2011 - Diene lach (Single)
  • 2012 - Kwietwaeg (Single)
  • 2013 - Ónderwaeg (Album)
  • 2013 - Ónderwaeg ft. Kristel Roulaux (Single)
  • 2014 - #NDRS (Single)
  • 2015 - Venloos Blood (Album)
  • 2015 - De muziek van Limburg (Verzamelalbum)
  • 2015 - Blieve Gaon (Single)
  • 2016 - Van de Zoépkoel wies 't Poskantoër (Opname t.b.v. video-productie Boétegewoëne Boétezitting - Stadscomité BBZ Venlo)

Videografie Van Gelder[bewirk | brón bewèrke]

  • 2010 - De Ster - Promotieclip tbv Mutsaafzette Jocus Dreejspan 2010
  • 2010 - Pak dien loupschoon - Videoclip ter ondersteuning van Stichting Energy4All tijdens de Venloop 2010
  • 2010 - Live optreden bij TV Limburg, voorafgaand aan "De Nach van 't Limburgs Leed".
  • 2010 - Video clip "Vergaef Mich"
  • 2010 - Video clip "Zóndaag"
  • 2011 - Video clip "Diene lach"
  • 2012 - Video clip "kwietwaeg"
  • 2013 - Video clip "Slaop beej mich"
  • 2013 - Video clip "Ónderwaeg"
  • 2014 - Video clip "Laot mich"
  • 2015 - Video clip "#NDRS"
  • 2015 - Studio-opname "Praot Venloos met mich / Släötjesbrök" (Opname Omroep Venlo)
  • 2015 - Video clip "Blieve Gaon"
  • 2016 - Sfeerreportage video "Van de Zoépkoel wies 't Poskantoër" (Opname t.b.v. video-productie Boétegewoëne Boétezitting - Stadscomité BBZ Venlo)

Externe links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Van_Gelder&oldid=395194"