The Line
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
The Line (Arabisch ذا لاين ḏā lāyn of الخط ʾal-ḫaṭṭ) is e steidelek bouwprojek in Saoedi-Arabië. 't Waor oersprunkelek gepland es 't veurnaomste woengedeilte vaan de te bouwe mieljoenestad Neom, in de noordwesteleke provincie Taboek. The Line is futuristisch vaan aard en op väöl gebeed hendeg vernuiend. In aprèl 2024 woort evels bekind tot 't euvergroet deil vaan de stad veurluipeg neet weurt gebouwd.
The Line zouw ziech oersprunkelek oetstrèkke euver 'n lengde vaan neet minder es 170 km, vaan 'n plaots kortbij de stad Taboek tot deep in de weuste. Oonderwijl is de bebouwing mer 200 meter breid. De stad krijg dus de aard van lintbebouwing. Dit deit me veural um de hits te kinne aofveure; conventioneel stei weure in 't heit Arabië door de opwerming vaan de Eerd ummer minder leefbaar. De straot zal bestoon oet drei niveaus: op de groond beujt me ruim baon aon de vootgengers, dao-oonder ligke twie laoge veur respectievelek transport en infrastructuur. Bove de groond moot me binne de vief menute nao alle meugeleke veurzieninge kinne loupe; de stad is daoveur in blokker verdeild. In de transportlaog moot 'nen hoegesnelheidstrein koume. Oto's zien in de stad neet welkom. De bebouwing geit bestoon oet gebouwe vaan 500 meter hoeg, ummer aon beiskante vaan de straot in spiegelbeeld.
In 2024 rapporteerde Bloomberg tot 't projek zwoer aofgesjaold woort. In plaots vaan de aongekunde 170 kilometer zouw tege 2030 mer 2,4 km klaorkoume. Dat zouw beteikene tot de stad ouch mer 300.000 inwoeners krijg, in plaots vaan de geplande nege mieljoen. De regering vaan 't land oontkinde dat en zag tot The Line wie gepland aofgebouwd góng weure.
De stad moot gans door doorzaam energie weure veurzeen. Artificieel intelligentie geit weure gebruuk um de bewoeners in de gater te hawwe en hun leefkwaliteit te verbetere.
The Line woort in jannewarie 2021 door kroenprins Mohammed bin Salman aongekundeg es deil vaan 't al iejer gepubliceerd Neom-projek. De bouw zouw in 2030 veerdeg mote zien; al in 2024 zouwe de ierste bewoeners hun hoes in kinne. Critici meine tot dat väöls te optimistisch is. Euver de bouw zien tot nog touw gein details bekind gemaak; in oktober 2022 woort op satellietbeelder dujelek tot de bouw euver de ganse lengde vaan de stad waor begós. De koste zien geraomp op 500 mieljard dollar; me geit devaan oet tot dit väöls te lieg is begroet.
In d'n democratische wereld veel zoewel bewoondering es kritiek te hure. Kritiek gaof 't neet allein op dinger vaan 't oontwerp meh ouch op de milieusjaoj - de stad kós al-evel emissievrij zien, de bouw zelf waor dat zeker neet. Ouch 't verdrieve vaan de Huwaytat-bevolking oet de regio waor punt vaan zwoer kritiek.