The Big Bang Theory (tillevizieserie)
Dit artikel is gesjreve (of begós) in 't Zjwaams. Laes hie wie v'r mit de versjillende saorte Limburgs ómgaon.
The Big Bang Theory is 'n Amerikaanse komiese tillevizieserie, bedach door Chuck Lorre en Bill Prady. De serie ging in première op CBS op 24 september 2007. De serie fókust zich op 't laeve van de vief personages, diej in Pasadena wone. De hoofrolle waere vertolkt door Jim Parsons es Sheldon Cooper, Johnny Galecki es Leonard Hofstadter, Simon Helberg es Howard Wolowitz, Kunal Nayyar es Raj Koothrappali en Kaley Cuoco es Penny.
In Nederlandj is de reeks sins 2 meert 2009 te zeen op Veronica. In Vlaondere is d'r sins 21 desember van det jaor te bekieke op Q2.
In augustus 2018 höbbe studio CBS en producent Warner Bros aangekondig det de suksesvolle serie nao 't inj van sezoen 12 (279 aafleveringe) definitief zal sjtoppe.
Verhaol[bewirk | brón bewèrke]
De tillevizieserie geit euver veer vrunj: Leonard Hofstadter, Sheldon Cooper, Howard Wolowitz en Rajesh Koothrappali, diej allemaol wèrke biej Caltech. Leonard, Sheldon en Rajesh zin gepromoveerd en höbbe ein PhD in de natuurwetensjappelike richting. Howard is 'n ingenieur mit 'n masterdiploma. 't Zin alle veer echte geeks: bolleboze mit 'n veurliefde veur wiskunde en fysica, ze sjpraeke versjillende tale (zo-es Klingon) en höbbe allemaol 'n hoog IQ. In häör vrieje tied sjpele ze veural kompjoetersjpelletjes, laeze ze strips en kieke ze gaer nao sciencefictionfilms en/of -series.
Leonard en Sheldon deile 'n vledding. Op eine daag kriege de twee 'n nuuje euverbuur: Penny. Aanvangkelik is ziej (in häör wäörd ''tiedelik'') serveerster biej aetgelegenheid The Cheesecake Factory mit akteerambizie. Ze is neet zo sjlum es de manne, mer häör sosiale vaerdigheje zin sjtökke baeter. Penny kump oet Omaha en is nao Los Angeles gekómme om 't te make in de sjowerreld, mer det wil neet zo good lökke. Leonard is ónmiddelik verleef op Penny, en zien vrunj plaoge hem daomit, omdet Penny volges häör ver boete zien bereik lik. Toch klikt 't tösse häör beije, maar door häör grote versjille in perseunlikheid en laevessjtiel is häör relatie/vrundjsjap de eerste sezoene van wisselend sukses. Oeteindelik trouwe ze in Las Vegas, om vervolges te sjeije. In sezoen 10 trouwe Leonard en Penny veur de tweede keer. Wiej Penny zei in häör gelofte: "I can't explain how happy I am to stand here, marrying you. Hopefully for the last time."
Rólverdeiling[bewirk | brón bewèrke]
Hoofrólle[bewirk | brón bewèrke]
| Akteur | Personage | Besjrieving personage |
|---|---|---|
| Johnny Galecki | Dr. Leonard Hofstadter | Leonard is ein van de vief protagoniste van 't tillevizieprogramma. Hae deilt de vledding 4A mit Sheldon en wèrkt biej Caltech op de aafdeiling experimentele natuurkunde, wo hae veural ongerzeuk duit mit lasers. Hae kump oet New Jersey. Leonard waert in de eerste aaflevering verleef op zien nuje buurmaedje Penny, mer haet soms ouch get mit angere dames, zo-es zien kollega Leslie Winkle en Priya, de zöster van Raj. Toet zien grote sjpiet kump Leonard oet 'nne femielie wo akademische prestaties en kènnis sentraal sjtaon. Zien moder Beverly is psychiater en neurowetensjapper, zien vader is antropoloog. Leonard haet ouch 'n zöster en broor, diej beije ajer zin den hem. |
| Jim Parsons | Dr. Sheldon Cooper | Sheldon is 'n nag grotere geek den zien drie vrunj: hae is sosiaal neet ech ongerlag en werkt de angere mit zien egocentrische vizie op alledaagse zake vaak oppe zenewe. Daonaeve zuut hae gen sosiale regels en haet d'r 'n grote behoefte aan sjtruktuur. Hae kèn paniekerig reagere wen d'r van vaste patrone waert aafgeweke. Hae duit veural óngerzeuk nao de snaartheorie en wèrkt es theoretisch fysicus biej Caltech. Sheldon waerde gebaore in Galveston (Texas) en kump oet eine kristelikke femielie. Hae haet 'n tweelingzös Missy en 'n broor George. Al vertoont Sheldon's gedraag väöl euvereinkomste mit 't syndroom van Asperger, is door de sjrievers aangegaeve det Sheldon geweun Sheldon is en det d'r biej te make van zien karakter neet gekeke is nao Asperger. Ouch gaeve ze aan det 'n diagnose van Sheldon juus zou beteikene det ze minder vriejheid höbbe om zien karakter te kènne óntwikkele. |
| Kaley Cuoco | Penny | Penny is de blónje euverbuurvrouw van Leonard en Sheldon, aafkomstig oet Omaha (Nebraska). Ze wèrkt es serveerster biej The Cheesecake Factory en is nao Los Angeles gekómme om 't te make in de sjowerreld, waat häör neet zo good lökt. Penny is euverduudelik minder sjlum den häör sjlumme buurmanne, mer is daotaenge sosiaal väöl vaerdiger en ziej probeert de manne soms get sosiale vaerdigheje biej te bringe (mit wisselend sukses). Leonard is vanaaf daag ein verleef op häör en ziej is ouch geïntreseerd in hem. |
| Simon Helberg | Howard Wolowitz | Howard haet als enige van de veer mannelikke personages gèn PhD gehaold, mer 'n ingenieursdiploma. Hae is joods en sjprikt versjillende tale. Leonard en hae zin al langer goje vrunj en hae haet 'n haat-leefde-verhajing mit Sheldon. Hae dinkt vaak det d'r sukses haet biej de vrouwluuj, mer kriegt meistal de deksel oppe naas. Howard woont nag biej zien moder en wèrkt biej Caltech onger angere veur 'n aantal ruimtevaartprojekte. Hae haaj 'n korte romance mit Leslie Winkle. Daonao kriegt d'r 'n relasie mit Bernadette, womit d'r zich later verlooft en oeteindelik aan 't inj van sezoen 5 trouwt. |
| Kunal Nayyar | Dr. Rajesh Koothrappali | Rajesh kump oet India en is selektief mutief: hae is neet in sjtaot om taenge vrouwluuj te sjpraeke. Hae klapt toe as 'n vrouw te dich biej 'm in de buurt kump. 't Lök hem inkel om iets taenge ze te zigke as d'r gedronke haet. Raj wèrkt es astrofysicus biej Caltech. Sins zien óngerzeuk vasgeloupe is, werkt d'r same mit Sheldon. Hae kump oet 'n rieke femielie en haet kóntak mit zien eljers in India via de webcam. Hae haet ouch nag drie breurs en twee zösters, worónger zien jongste zöster Priya (diej later 'n biejról kriegt). Vanaaf sezoen 6 kèn Rajesh zonger det d'r gedronke haet mit vrouwe kalle. |
| Mayim Bialik | Dr. Amy Farrah Fowler | Amy versjient veur 't eerst in de letste aaflevering van 't derde sezoen. Howard en Raj make, biej wieze van eksperiment, ein datingprofiel aan veur Sheldon en neurobioloog Amy is de oetverkorene. Op de date bliekt Amy ein vrouwelikke verzie van Sheldon te zin, toet grote ergernis van Howard en Raj. Nao häör date haje Sheldon en Amy kóntak via de webcam, mer tiedens 't veerde sezoen trèkt Amy ouch sjteeds meer op mit de vrunj. Ziej geit ouch vaker om mit Penny en Bernadette, ze nömt Penny zelfs häör beste vriendin, get waat Penny neet gaer heurt. Al ómsjrieve Amy en (veural) Sheldon häör relasie in 't veerde sezoen sjteeds es versjtanjelik (Sheldon zaet regelmaotig: "She's a girl and she's my friend, but she is NOT my girlfriend"), höbbe ze sins sezoen vief offesjeel 'n relasie. |
| Melissa Rauch | Dr. Bernadette Rostenkowski | Bernadette kump veur 't eerst veur in 't derde sezoen. Leonard en Howard höbbe ein pact mit elkaar: wen de eine 'n vriendin haet, zal hae de angere kóppele aan ein van häör vriendinne. Penny sjtelt Howard veur aan Bernadette, ein van häör kollega's diej biej The Cheesecake Factory wèrkt om häör sjtudie microbiologie te bekóstige. Häör eerste óntmoeting verlöp sjtroef, toet ze óntdekke det ziej allebei häör moder neet kènne luchte. De twee beginne 'n relasie, mer Howard bedruug Bernadette virtueel. In 't veerde sezoen keert Bernadette truuk es vriendin van Howard en waert ziej ein vas personage. Ziej behaolt aan 't inj van 't veerde sezoen häör PhD en geit daonao aan de sjlaag biej 'n farmaceutisch bedrief. In sezoen 5 trouwe Howard en Bernadette. |
Biejrólle[bewirk | brón bewèrke]
| Akteur | Personage | Besjrieving personage |
|---|---|---|
| James Hong | Chen | Chen is ein van de obers van 't Sjinees resterant Szechuan Palace. Chen haet 'n hekel aan Sheldon en Howard, omdet ziej dinke det ze Manderijn kènne sjpraeke. Zo merkt Chen in de aaflevering The Dumpling Paradox, biej 't ontbraeke van Howard aan de taofel, op det ' 't vervaelende menke, dae dinkt det d'r Manderijn kin sjpraeke ' d'r neet is. |
| Kevin Sussman | Stuart Bloom | Stuart is de eigeneer van The Comic Center of Pasadena, de sjtripwinkel wo de veer vrunj väöl kómme. Hae haet talent veur teikene en raakt hiejdoor zelfs aan 'n date mit Penny. Stuart is good bevrundj mit Wil Wheaton. |
| Carol Ann Susi | Mrs. Debbie Melvina Wolowitz | De euverbezorgde en grofgebekte moder van Howard. Ziej is 'n onzichbaar personage. (Al is ziej in aaflevering 6.15 inkele kere kort te zeen. Häör gezich blieft echter boete beeld.) Häör kakelende sjtum is vaak te heure wen ziej taenge häör zoon roopt vanoet ein angere kamer. Ziej is joods en behanjelt häör zoon es 'n kindj. Volges de angere personages liejt mevrouw Wolowitz aan ernstig euvergewich en haet ze 'n sjnor en 'n pruuk. Häör man, de vader van Howard, ging d'r tössenoet toen Howard èlf waas. 't Personage euverliejt in sezoen 8, naodet de vertolkende aktrice waas euverleje. |
| John Ross Bowie | Barry Kripke | Barry is 'n kollega biej Caltech, wo hae óngerzeuk duit in plasmafysica. Hae haet 'n vorm van rotacisme, wodoor hae de letter r en l oetsjprik as 'n w. Barry is weinig simpetiek en hae is 'n vijand van Sheldon Cooper. |
| Wil Wheaton | Zichzelf | Wil Wheaton versjient veur 't eers es 'n antagonistiese verzie van zichzelf in sezoen drie. Sheldon zoog 'm vreuger es zien idool, mer sins Wheaton neet op kwoom dage op 'n kónvensie wo Sheldon 10 oer veur in de bös haaj gezaete, zuut Sheldon Wheaton es zien vijand. Echter, naodet hae Sheldon ein gesigneerde aktiefiguur van Wesley Crusher guf, waert Wheaton ziene vrundj. |
| Laurie Metcalf | Mary Cooper | De zeer religieuze Texaanse moder van Sheldon. Mevrouw Cooper is de enige diej innigsins invloed haet op Sheldon, es d'r probleme zin mit Sheldon waert mevrouw Cooper ingerope. Leonard zuut häör es Sheldons kryptoniet. |
| Aarti Mann | Priya Koothrappali | Priya is 'n zöster van Raj Koothrappali, ziej kump veur 't eers in beeld in 't veerde sezoen. Ziej bringt 'n kort bezeuk aan häör broor, det eindigt in 'n onenightstand mit Leonard. Priya keert later veur langere tied truuk en ziej krieg 'n relasie mit Leonard, dae geheim mot blieve veur häör eljers. 't Liekt d'r eers op det ziej 'n baan zou kriege in de buurt van Leonard, mer aan 't inj van 't sezoen geit ze truuk nao India. Ziej probere nag 'n langeaafsjtandjsrelasie te óngerhaaje, mer gaon oeteindelik oet elkaar in 't viefde sezoen. |
| Christine Baranski | Dr. Beverly Hofstadter | Beverly Hofstadter is de moder van Leonard. Ziej is ekstreem analyties en haajt euverdreve väöl raekening mit details. Mevrouw Hofstadter is zowaal psychiater es neurowetensjapper en ziej waert gezeen es 'n vrouwelikke equivalent van Sheldon. Es ziej veur de tweede keer in de serie op bezeuk kump, bliekt 't zelfs det ziej 'n väöl baetere versjtandjhajing haet mit Sheldon den mit häör eige zoon. |
| Sara Gilbert | Dr. Leslie Winkle | Leslie is 'n rechsjtreekse kóllega van Leonard diej sporadies opduukt in de reeks. D'r hangt 'n seksuele sjpanning tösse de twee, diej heel aaf en toe nao baove kump. Leslie kèn Sheldon neet oetsjtaon en numt hem sjteevas "dumbass" ("sjtommerik"). In 't begin versjient ziej regelmaotig in de serie, mer later in sezoen 2 verdwient ze oet beeld omdet de sjrievers neet veur elke aaflevering matriaal veur häör koste bedinke. Daonao kump ze heel aaf en toe nag waal ens in ein aaflevering veur. |
Aafleveringe[bewirk | brón bewèrke]
| Sezoen | Aantal aafleveringe | Oetgezónje |
|---|---|---|
| 1 | 17 | 24 september 2007 – 19 mei 2008 |
| 2 | 23 | 22 september 2008 – 11 mei 2009 |
| 3 | 23 | 21 september 2009 – 24 mei 2010 |
| 4 | 24 | 23 september 2010 – 19 mei 2011 |
| 5 | 24 | 22 september 2011 – 10 mei 2012 |
| 6 | 24 | 27 september 2012 – 16 mei 2013 |
| 7 | 24 | 26 september 2013 – 15 mei 2014 |
| 8 | 24 | 22 september 2014 – 7 mei 2015 |
| 9 | 24 | 21 september 2015 – 13 mei 2016 |
| 10 | 24 | 19 september 2016 – 11 mei 2017 |
| 11 | 24 | 25 september 2017 – 10 mei 2018 |
Dvd's[bewirk | brón bewèrke]
| Dvd | Regiokode 1 (N.-Am.) | Regiokode 2 (Eur.) | Aafl. |
|---|---|---|---|
| Sezoen 1 | 2 september 2008 | 12 jannewarie 2009 | 17 |
| Sezoen 2 | 15 september 2009 | 19 oktober 2009 | 23 |
| Sezoen 3 | 14 september 2010 | 27 september 2010 | 23 |
| Sezoen 4 | 13 september 2011 | 26 september 2011 | 24 |
| Sezoen 5 | 11 september 2012 | 3 september 2012 | 24 |
| Sezoen 6 | 10 september 2013 | 2 september 2013 | 24 |
| Sezoen 7 | 16 september 2014 | 8 oktober 2015 | 24 |
| Sezoen 8 | 15 november 2015 | 14 november 2015 | 24 |
| Sezoen 9 | 13 september 2016 | 29 augustus 2016 | 24 |
Waardering[bewirk | brón bewèrke]
The Big Bang Theory en häör makers zin mit versjillende prieze bekroond, worónger drie Emmy Awards en ein Golden Globe veur Jim Parsons. Twee angere hoofrólsjpelers, Kaley Cuoco en Johnny Galecki, nome in 2012 èlk ein Satellite Award in óntvangs; de serie zelf waerde det jaor ouch bekroond mit 'nne Satellite.
Bezónjerhede[bewirk | brón bewèrke]
- De personages Leonard Hofstadter en Leslie Winkle waere gesjpeeld door akteur Johnny Galecki en aktrice Sara Gilbert. Ziej sjpeelden eerder van 1992 toet en mit 1997 same in de tillivizieserie Roseanne, es de jongste dochter van 't titelpersonage en häör vriendje.sonages Leonard Hofstadter en Leslie Winkle waere gesjpeeld door akteur Johnny Galecki en aktrice Sara Gilbert. Ziej sjpeelden eerder van 1992 toet en mit 1997 same in de tillivizieserie Roseanne, es de jongste dochter van 't titelpersonage en häör vriendje.
- Sheldons moder Mary Cooper is 'n biejrol van Laurie Metcalf, diej in Roseanne ein hoofról sjpeelt es de zöster van 't titelpersonage.
- Aktrice Mayim Bialik, diej de ról van Amy Farrah Fowler sjpeelt, waerde biej 't grote publiek bekend es Blossom in de gelieknamige tillevizieserie. Net es häör personage in de serie is Bialik gepromoveerd in de neurobiologie.
- Van Penny is es enige hoofpersonage in de serie de achternaam noojt genumd.
- In aaflevering 13 van sezoen 1 zeuke Leonard, Raj en Howard ein veerde lid veur häör team veur de wetensjapsquiz. D'r waert geopperd om "diej meid van Blossom" (Mayim Bialik) te vraoge, omdet ziej inmiddels neurobiologe is. Dit waert sjnel weggewuifd. In de letste aaflevering van sezoen 3 duit Bialik häör intreje es Amy Farrah Fowler.
- In aaflevering 16 van sezoen 6 sjpeelt Kaley Cuoco's zöster Briana de ról van Gretchen, ein veurmalige vriendin van Penny diej häör vrundj had ingepik.
- Op 't bordje aan de moer in de keuke van de vledding van Leonard en Sheldon sjteit Petre Devos. Det is de naam van ein broeweriej in Oudenaarde, België.