Sjterresjtad

Van Wikipedia
(Doorverweze van Starestad)

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.


Sjterresjtad (Russisch:Звёздный городок "Zvjozdny gorodok"; Sjterresjtedsje) is 'n keunstmatige plaatsj in Rusland, in de oblast Moskou en ten noordooste va Moskou, oeë kosmonaute getraind werre vör hun missies in 't Kosmonautentrainingscentrum Joeri Gagarin (GCTC). D'r wónne oongeveer 10.000 luuj.

Mèt de planne van de Sovjet-Unie öm luuj in de ruumde in te sjikke, oontsjtóng in 1960 de behoefte an e trainingscentrum väör toekomstige kosmonaute. Sjterresjtad waoërt gesticht es wónplaatsj väör de kosmonaute en hön families en väör de werknömers en hön families. De families moeche gewoeën blieve wónne in Sjterresjtad, ooch al waor d'r kosmonaut inmiddels gepensioneerd of veroongelukt. In d'r Sovjettied waor Sjterresjtad 'ne uterst geheime lóchmachtbasis, dae óp gèng eenkel kaart te veende waor.

Sjterresjtad is allewiel 'n plaatsj oeë alle väörzieninge väörhande zeunt. 't Haat oonder mieë 'n ege pooskantoeër, 'ne weenkel väör de dagelekse boodsjappe, en d'r is e museum gewiejd an ruumdevaart. In 't museum zeunt oonder mieë de diploma's van Joeri Gagarin te zieë en versjillende oondersjèjjinge die e kraeg.

Ooch d'r Belsje astronaut Frank De Winne kraeg hie zieng ópleiding.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Sjterresjtad&oldid=389858"