Sleter

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


'ne Focaalvlaksleter. De gordijen bewege verticaal.

'ne Sleter is 'n oonderdeil vaan 'ne camera wat deveur zörg, same mèt 't diafragma, veur 't beleechte vaan de film of sensor. 't Gief versjèllende soorte sleters: focaalvlaksleters, blaadsleters, diafragmasleters en centraolsleters.

Focaalvlaksleters[bewirk | brontekst bewerken]

Focaalvlaksleters zien miestal gemaak van stof, metaol of plastic "gordijne" die de film of sensor aofsjerme vaan leech. Bij beleechtinge vaan mier es de zoegenaomde X-sync snelheid, geit 't ierste gordijn ope, woebij de film of sensor aon 't leech weurt bloetgestèld, en nao de benudigde sletertied slut 't twiede gordijn alles weer aof. Bij sletertije korter es de X-sync snelheid, volge de twie gordijne elkaar woebij 'n spleet oontsteit die euver de film of sensor heen beweeg. De spleet is zjus zoe groet gemaak same mèt de snelheid vaan de bewegende spleet) tot de film of sensor lang genóg beleech weurt. Dit lievert aonzeenlek kortere beleechtingstije op.

't Veurdeil vaan focaalvlaksleters is tot gebruuk gemaak kin weure vaan verwisselbare lenze zoonder tot eder lens moot weure oetgerös mèt 'ne eige centraalsleter.

't Gief ouch naodeile:

  • Vervörming vaan snel bewegende objekte: allewel eder deil vaan de film of sensor perceis lang genóg beleech is, is neet eder punt op 't zelfde tiedstip beleech.
  • Ze make väöl geluid, wat probleme kin oplevere bij natuurfoto's of "verborge" opnames.
  • Ze zien mechanisch gezeen meujeleker te make mèt es gevolg 'ne kortere levensdoer.
  • 't Bewege vaan de gordijne kin 'n beweging vaan de camera veroorzake, boedoor bewegingsoonsjerpde weurt geïntroduceerd.

Blaadsleters[bewirk | brontekst bewerken]

Blaadsleter

Blaadsleters zien sleters woebij ein of mierdere 'blajer' veur 't diafragma drejje um dit aof te slete. Tijdes de beleechting drejt 't blaad (of de blajer) weg vaan de opening en nao de vereiste beleechtingstied geit 't weer touw. Dit type sleter kump dèks veur in goodkoupe (wegwerp)camera's. Miestal höbbe ze mer eine vaste sletertied. Dao tegeneuver steit tot ouch sommege vaan de deurste en mies perceize camera's dit soort sleter heet. Sletertije van 1/40.000 vaan 'n seconde zien meugelek in modern camera's.

Diafragmasleters[bewirk | brontekst bewerken]

Diafragmasleter

Diagfragmasleeters zien 'n soort blaadsleters mer de blajer bestoon hei oet mierdere dun blajer die euverein bewege en daodoor 'n min of mier ron opening vörme. Dit zörg metein veur 't benudegde diafragma wat nudeg is veur 't make vaan de beleechting. De blajer goon snel ope en blieve daan veur de benudegde tied opestoon, boenao ze weer snel slete. Wie mie blajer, wie ronner de cirkelvörmege opening. Miestal weurt 'n oneve aontal gebruuk, 3, 5 of mie.

Centraolsleters[bewirk | brontekst bewerken]

Centraolsleters zien sleters die miestal in de lens zien gebouwd. Dèks dene zie boete es sleter ouch es diafragma. Umtot zie in de lens zien gebouwd, kinne ze klein weure oetgeveurd, de constructie is sumpeler es bv. focaalvlaksleters, en ze zien goojekouper te producere. 't Naodeil is tot ze bij verwisselbaar lenssysteme in eder lens mote weure ingebouwd.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Sleter&oldid=341337"