Sjloekderm

Van Wikipedia
Gank nao: navigatie, zeuke

Dit artikel is gesjreve in 't Remunjs. 't Weurt gewaardeerd óm in dit artikel 't Remunjs aan te hauwe of aan te gaeve welk anger dialek gebroek is.


De plaats van de sjloekderm in 't lief.

De sjloekderm, sjpiesreur of oesofagus (ouch gesjpèld es oesophagus) is 'n óngerdeil van 't sjpiesvertaeringssjtilsel. De sjloekderm is 't deil van 't maag-dermkenaal tösse de móndj en de maag. Alle zougderen en väöl anger beester höbbe 'ne sjloekderm.

De sjloekderm is bie luuj óngeveer 30 centimaeter lank, haet 'ne gemiddelden diamaeter van 2 centimaeter en begint aan de baovekantj in de farynx of kaelholte en injig aan d'n angere kantj bie de maag. In de sjloekderm zeen väöl vernejjinge. De eerste, de bäöveste sjloekdermsjloetsjpier, ligk op 15 centimaeter van de tandjrie. De tweede en derde vernejjinge bevinje zich t'r heugde van betrèkkelik de linkse bronchustak en de aorta. De veerde vernejjing ligk net baove d'n euvergank van de sjloekderm in de maag, op 't niveau van 't midderif en weurt de ungelste sjloekdermsjloetsjpier geneump. De wichtigste functie van de ungelste sjloekdermsjloetsjpier is 't aafsjloete van d'n óngerkantj van de sjloekderm, zodet 't truuksjtruime van maaginhoud nao de sjloekderm (reflux) weurt veurkómme.

De sjloekderm zelf is beklèd mit meerläögig neet-verhaornend plaveiselepitheel. d'n Euvergank van de sjloekderm nao de maag weurt gemirk door e versjil in type epitheelcel.

Twee sjpierlaoge zörge veur de peristaltiek van de sjloekderm: 'n binneste laog (löp circulair) en 'n boeteste laog (löp van baove nao ónger). In 't bäöveste en derde deil van de sjloekderm bestaon dees boeteste sjpiere oet dwarsgesjtreepde sjpiere en in 't ungelste deil oet gledde sjpiercelle.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Sjloekderm&oldid=378806"