Sjeng Fransse

Dit artikel is gesjreve in 'n ónbekènd dialek. Es doe wèts wat veur dialek dit is, weurt 't gewaardeerd óm dit aan te gaeve.

Sjeng Fransse (Thöll), is 'ne Limburgse troubadour en entertainer.

Al sinds zien 15e jaor sjrief en zèngt Jean Keulen, alias troubadour Sjeng Fransse oet Thöll-Sjenne, noe wonend in Hulsberg leedjes, gedichte, limmerikke en moppe. Hae is begós op zien 15e met vasteloavesleedjes veur Sjènne en omsjtreke. Dat waor ummer competitie mèt Sjef Dedere en buutreedner Cornelke van Cruchte, die ouch in Sjènne in de jaore 1955 tot 1959 mètdinge om de beste carnavalsschlager. Jean won es sjnaak van rond de 15 jaor drie kier de ieësjte pries met o.a. de leedjes: "De blaoskapel", "Wat zeent ver toch mer gruetsj op oze sjlambazin" (huidige visviever, voor 1953 slibviever voor de staatsmiene) en "Wat eine bazel, wat eine kwatsj".

Daonao is "Sjeng Fransse" (zien mam heisjde Josefien Franssen) gaon trouwe en haet zich tot 1980 sjtil gehoute, totdat hae t.g.v. de Aktie Geuldal in 1980 ein leedje euver dat Geuldal ging sjrieve en vanoet de Volmeule in Ieëpe veur de NCRV-radio ging zènge in 't serieus programma: "Een uur natuur". Dat leedje wurt noe al jaore door Falcon-radio gedrejd elke zoaterdigmörge bie 't begin van 't programma "Valkenburg Aktueel". Jean is groeët natuur- en deervrundj.

In 1980 sjtòng Jean in de landeleke hitparade van "Op volle toeren" geprezenteerd door Giel Montagne mèt zien sjnel gesjreve leedje euver Joop Zoetemelk dea in dat jaor de Tour de France wòn. Het leedje heisjde "jopie ja, ja, Jopie, Jopie jé" Hae haet toen het plaetje zelf aan Joop oetgereikt in Sumpelveld woa Joop ein criterium reej.

In 1989 leet hae zich op eine zóndigmiddig ens veur de grap hure in de populaire herberg "De Swaen" in 's Gravenvoere (B) en daomet houw hae zoeëväöl succes dat hae van alle kante gevraog ging waere om luuj te amusere. Allein in tente mèt zoep-publiek traet hae neet op. Intösje is Jean ruem 20 jaor aktief es hobby-arties en haet ca. 900 optraejes achter de rögk es Limburgse minnesjtreel/ troubadour. Zien 5 in eige beheer gemaakte cd's gaon taege kospries van de handj.

In 1994 woort Jean gefilmd door de WDR, de Wesduutsje televisie die bie kesjtieël Schaloen in Valkeberg opname maakde veur de documentaire "Deutschlandbild der Holländer". Aan die documentaire ding ouch Rudi Carell mèt. In 2008 is Sjeng Fransse door L1 genomineerd veur de Jo Erenspries. Verder verlieënde hae mitwirking aan 't Haelesj sjtreektheater en aan de succesvolle musical "De Bokkenrijders" in 't aopeloechtheater van Valkeberg.

Discografie en ander werk

Zien cd's o.a.: "Euver leefde en leid", "Dao is mien moderland", "Nostalgie", "Nostalgasie" en op versjillende verzamel-cd's.

2011 'Gewirwar in Limburg', beukske mèt gedichte en tekste.