Servisch hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Dušan Tadić, anno 2022 aonveurder en mies ervaore nog actieve speuler vaan Servië.

't Servisch hierevoetbalèlftal vertreujt Servië in internationaol voetbalmatche. 't Team besteit sinds 2006, wie Servië 'n oonaofhenkelek land woort, meh 't zuut ziechzelf gere es d'n opvolger vaan 't Joegoslavisch hierevoetbalèlftal, wat vaan tied tot tied aonsprekende rizzeltaote haolde. Servië huurt in Europa zoeget tot de middegróp en heet mèt regelmaot op e WK gestande.

Historie

't Keuninkriek vaan Serviërs, Kroaote en Slovenië, later bekind es Joegoslavië, woort kort nao d'n Ierste Wereldoorlog gespäöld en kraog al gaw zien eige team. Dit team späölde in 1920 op de Olympische Speule in Antwerpe zienen ierste match (7-0 verlees tege Tsjecho-Slowakije). Kort nao d'n Twiede Wereldoorlog woort e toernooj gehawwe boe-in 't nationaol team vaan de Volksrippubliek Joegoslavië en oonofficieel teams vaan de zès deilrippublieke 't tegenein opnaome. Servië won hei-in vaan Montenegro en Kroatië um in de finaal vaan 't nationaol team te verlere.

Wie Joegoslavië begin jaore negenteg oetereinveel, góng de rompstaot Klein-Joegoslavië gooddeils samevalle mèt Servië: 't väöl kleinder Montenegro, d'n aandere staot, lieverde neet väöl speulers. Dit team woort e paar jaor laank oetgeslote vaan EK's en WK's, veural um diverse oorlogsmisdaode vaan de Serviërs in de börgeroorlog in Bosnië. Pas op 't WK vaan 1998 kós 't weer mètdoen. Ouch op 't EK vaan 2000 gaof 't land presint. Op allebei woort 't team in de knock-outrunde oetgesjakeld door Nederland. Nao 2003 góng 't land wijer oonder de naom Servië-Montenegro. De lèste kier tot dit team op 'n internationaol toernooj stoont waor op 't WK vaan 2006.

Es oonaofhenkelek land heet Servië de successe vaan 't aajd Joegoslavië neet kinne evenere. Veur 't EK wis 't ziech nog noets te plaotse. Wel stoont 't drei kier op 't WK: in 2010, in 2014 en in 2022. De ierste twie edities kaom 't land neet veurbij de grópsfaas.