Samara

Van Wikipedia
Naar navigatie springen Jump to search

Dit artikel is begós in 't Mestreechs. Laes hie wie v'r mit de versjillende saorte Limburgs ómgaon.


Beziensweerdeghede en kinmerkende beelder vaan Samara.

Samara (Russisch Сама́ра) is 'n stad in Rusland. 't Is de hoofstad vaan 't gelieknaomeg oblas en de zèsde groetste stad vaan 't land mèt 'n bevolking vaan 1.164.685 bij de volkstèlling vaan 2010. Samara ligk aon de moond vaan de revier de Samara in de Wolga, bij de zoegeneumden Drej vaan Samara, tegeneuver 't Zjigoeligebergde. De stad heet 'n industrieel karakter en is in Rusland veural bekind es ruimtevaartstad.

In wat noe Samara en umgeving is waor in 't vijfde milennium veur Christus al de Samaracultuur. Ouch weurt de regio in verband gebrach mèt de oersprunk vaan de Indogermaanse volker (de zoegeneumde Koerganhypothese). Wienie de stad Samara woort gestiech is neet dudelek, meh de strategische ligking vaan de plaots aon de samekoms vaan twie reviere maakde ze wel geleef bij piraote. De plaots steit ingeteikend op Italiaanse kaarte oet de veertienden iew. Um de piraoterij te beïndegde deeg de groetvoors hei in 1586 e fort bouwe; dit gelt es 't stiechtingsjaor vaan Samara. In de iewe die volgde bleujde d'n handel mèt zoewel Moskou es 't ooste hei op en kós de stad flink greuje. Vaanaof 1851 waor Samara hoofstad vaan zien eige gouvernoraot (daoveur had 't bij 't gouvernoraot vaan Simbirsk gehuurd). Al ruim veur de revolutie industrialiseerde de stad.

In 1935 woort Samara herneump tot Koejbysjev, nao revolutionair Valerian Koejbysjev. Dee naom zouw ze tot 1991 drage. Koejbysjev greujde oonder communistisch bewind oet tot centrum vaan de Sovjetrussische waope-industrie, veural naotot de Sovjet-Unie d'n Twiede Wereldoorlog in waor getrokke. Door de geveulegheid vaan dees activiteite veraanderde 't in 'n geslote stad, boe me allein mèt speciaol permissie in moch. Koejbysjev woort ouch lochvaart- en ruimtevaartstad.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Samara&oldid=428076"