STS-129

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Insigne vaan de STS-129 missie

STS-129, ofwel voloet Space Transportation System 129, is 'n Space Shuttle missie nao 't International Space Station. De missie weurt oetgeveurd door de Space Shuttle Atlantis. Op 16 november 2009 um 14:28 oor (20:28 Nederlandsen tied) is d'n Atlantis gelanceerd. Nao dees missie gief 't nog vief missies veurtot de Space Shuttles mèt pensioen goon.

STS-129 is de 31e space shuttle-missie nao 't ISS. De missie is bedoeld es beveurraodingsmissie um 't ISS te veurzien vaan reserve-oonderdeile veur es de Space Shuttles neet mie vlege.

Bemanning[bewirk | brontekst bewerken]

De bemanning besteit oet 6 persoene, boevaan 'rs drei al ieder in de ruimte zien gewees. De drei aandere goon veur d'n ierste kier de ruimte in.


De missie[bewirk | brontekst bewerken]

De missie doort 11 daog. 't Is de lèste missie die 'ne astronaut oet 't ISS mèt trök zal neume (d'r blijf dus geine aandere astronaut achter). Crew rotation zal allein nog mèt de Russische Soyuzrakèt goon gebäöre.

D'r weure hiel väöl reserveoonderdeile veur 't ISS mètgebrach, zoetot 't ISS genóg oonderdeile heet es de Space Shuttles mèt pensioen zien.

D'r zien drei ruimtewandelinge gepland. Daoneve weure netuurlek ouch gedorende twie doag de roboterm vaan de space shuttle en 't ISS gebruuk, um de vrach oet 't ruim vaan de space shuttle te hole en aon 't ISS te bevestege.

Op 4 november woort de vrach (de payload) in de Space Shuttle geplaots.[1]

Op maondag 16 november 2009 woordt de Atlantis zoonder vertraginge gelanceerd um 14:28 oor (20:28 Nederlandsen tied). Op dinsdag 17 november woort alleriers 't hittesjèld gecontroleerd veur meugeleke defekte en woort de ExPRESS Logistics Carrier 1 ('n soort platform wat mèt reserveoonderdeile is oetgerös) aon de roboterm vaan de shuttle gekoppeld.

Op d'n daarden daag vaan de missie woort d'n Atlantis gekoppeld aon 't ISS. Op 't momint tot de luike tösse de twie ruimtevaartuige ope ginge woordt astronaut Nicole Stott, die 80 daog aon boord vaan 't ISS is gewees, lid vaan de crew vaan STS-129.

Op de veerden daag (19 november 2009) voont de ierste ruimtewandeling plaots. Veur astronaut Micheal Foreman waor dit zien veerde ruimtewandeling, veur astronaut Robert Satcher zien ierste. Umtot de geplande aktiviteite 2 oor veur laoge op sjema, woorte extra aktiviteite ingepland. Nicole Stott vierde dezen daag häöre 47e verjaordaag. 'n Oor naotot de crew waor goon slaope góng 't alarm in 't ISS aof tot d'n drök in 't ISS snel aof zouw numme. Dit waor evels 'n vals alarm.

De vijfden daag waor veural ingepland mèt aktiviteite in 't ISS. In de Unity module woorte kabele en buize en slange geplaots es veurbereiding op de koms vaan de Tranquility module bij de volgende Space Shuttle missie (STS-130). Obbenuits woort de crew wakker gemaak door 'n drökalarm. Resultaat waor tot de twie astronaute die de volgende daag 'n ruimtewandeling mooste make, neet koste slaope in de dröksluis boe dat normaal gebäört.

Op daag zès (21 november 2009) voont de twiede ruimtewandeling plaots. Oondaanks tot de ruimtewandeling waor ingekort waor d'r toch nog tied um al take vaan de daarde ruimtewandeling oet te veure. Ouch woort op dezen daag de ExPRESS Logistics Carrier 2 oet 't ruim vaan d'n Atlantis gehaold en geplaots op 't S3-segment vaan 't ISS.

Daag 7 waor 'ne halve rösdaag. Astronaut Randolph Bresnik kós de crew vertèlle tot die nach zien döchterke gebore waor. Heer is d'n twiede astronaut dee vajer is gewore dewijl heer in de ruimte verbleef. De veurbereidinge veur de daarde ruimtewandeling woorte getroffe.

Op daag 8 (23 november 2009) voont de daarde en lèste ruimtewandeling plaots.

't Luik woort geslote tösse Atlantis en 't ISS op 24 november 2009. Ieder deen daag woort d'n Atlantis gebruuk um 't ISS in 'n hoeger baon um de Eerd te bringe. Dees manoeuver zörgde deveur tot de snelheid vaan 't ISS zoe'n 75 cm per seconde groeter woort en de baon zoe'n 1,5 km hoeger.

Op daag 10 woort d'n Atlantis losgekoppeld. Bij 't euverboord zètte vaan aofvalwater woort 'n probleem geconstateerd, boedoor slechs de hèlf vaan 't water euverboord góng. Sjijns is 'n buis verstop. Tijdens 'n vief oor dorende inspectie woort 't hittesjèld nog 'ns naogeloerd.

Daag 11 woort gebruuk um allerlei spulle op te ruime en de systeme veur trökkier te teste.

Op 27 november 2009 (d'n twelfden daag) koum d'n Atlantis um 8:44 oor plaotseleken tied (15:44 Nederlandsen tied).

Referenties[bewirk | brontekst bewerken]

  1. Twitter beriech vaan Nasa
Aafkomstig van Wikipedia, de Vriej Encyclopedie. "http://li.wikipedia.org/w/index.php?title=STS-129&oldid=341735"