Rogier Wassen
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Remunjs, es te dit dialek sjpriks.
Rogier Wassen (Remunj, 9 augustus 1976) is eine Nederlandjse tennisser, dae in 1994 toetrooj tot de professionals. Hae haet zich veural toegelag op ’t heëre döbbelsjpel, wo-in hae succesvoller bleek te zeen es in 't ènkelsjpel.
Juniorecarrière
[bewirk | brón bewèrke]Wassen is eine rechsenjigge sjpeler en hae begoosj mèt tennisse op zien zevende jaor. Hae sjpeelde biej de lokale tennisclub in Herkebusj, wo Silvio van Gool ziene trainer waas. Al vriej sjnel waas dudelik dat hae ein ech talent waas. Vanaaf zien tieënde sjpeelde hae op 't districtsniveau in Limburg. Geert Quaedvlieg waas daobiej de districtstrainer. Nao tweë jaor woort Quaedvlieg ziene perseuënlikke trainer-coach en hae is dat pes noe gebleve, wat vriej uniek is in de tennissjport.
Wassen wis in alle laeftiedscategorieë Nederlands kampioen te waere. Hae woort op zien vieftieënde zoawaal in de categorie tot en mèt zöstieën es biej de categorie tot en mèt achtieën nationaal kampioen. Biej de seniore woort hae nationaal kampioen op 20 mei 1995.
Wassen wis daonaeve in 't juniorecircuit diverse toernoje te winne. Op de Orange Bowl Cup, 't officieus waereldkampioensjap ónger zöstieën in Miami, sjpeelde hae es 15-jaorige de finale, mer hae verloor en woort zoa tweëde. Tweë jaor later op 't Europees kampioensjap in Klosters (Zjwitserlandj) woort hae in de finale in de derde set versjlage door Carlos Moyà mèt 6-4.
Profcarrière
[bewirk | brón bewèrke]Rogier Wassen haet zich toegelag op 't döbbelsjpel, hae sjpeelde dèks same mèt de Zuud-Afrikaan Jeff Coetzee. Zie behaolde same in 't kalenderjaor 2007 tweë titels, in Auckland en biej de Ordina Aope in Rosmale.
Rogier Wassen is oouch twee keër oetgekómme veur ’t Nederlandjs Davis Cup-team. Hae verloor dao-in twee keër, eine keër same mèt Peter Wessels, de angere keër mèt Robin Haase.
In zien ganse carrière bookde Wassen veer döbbeltitels, wo-ónger tweë in 2007.
Biej de Grandslamtoernoje dróng Wassen meërdere keëre door tot de derde runj en eine keër tot de kwartfinale (Australië). Op 18 juni 2007 sjtóng Rogier Wassen op zien hoagste peziesie op de waereld-döbbelranglies, ein 24ste plaatsj.
In juli 2007 behaolde hae same mèt Robin Haase de finale van 't döbbeltoernooj biej de Dutch Open in Amersfoort. Hiejin verloor hae aevel van ein Argentiens duo mèt 6-2 en 6-0. In Limburg woort Rogier Wassen in 2007 verkaoze tot Sjportman van 't jaor.
2010
[bewirk | brón bewèrke]In jannewarie versjloog Wassen, aan de ziej van de Argentien Horacio Zeballos, de nummersj ein van de waereld Bob en Mike Bryan.
't Eësjte heuëgdepuntj van 2010 waas in 't Italiaanse Cordenons, wo Wassen same mèt Robin Haase ein Challenger-toernooj wón. Ein waek later, dit keër mèt Dustin Brown, zegevierde Wassen op 't Challenger-toernooj van Kitzbühel.
Op de US Open woort mèt de Duutsjer Florian Mayer de achste finale bereik, daoin woort verlaore van de Sjanjaarde Marcel Granollers en Tommy Robredo. De gooj samewirking mèt Brown woort in Szczecin, Pole vervolg, wo Wassen ziene derde Challenger van 2010 wón. Ein waek later haolde dees twee ouch de finale van 't ATP-toernooj in Metz.