Riefkeuk

Van Wikipedia
(Doorverweze van Riefkook)
Naar navigatie springen Naar zoeken springen

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.


Riefkeuk mit appelpoetsj

Riefkeuk (Dütsj: Reibekuchen) zint kling keuksjkes deë gemaak weëde va gerieve eëpel. Riefkeuk lieke vöal óp de Zjwitserse rösti. Ze zint evvel get klinger en ze bevatte i teëgesjtelling tot rösti gee sjpek of kieës, mar waal ei en meël es binkmiddel. De keuk weëde i vöal deler van Europa gegeëte, mar ze weëde nog waal 't mieëts geassocieerd mit 't Rienland, wiewaal ze óch i g'n res va Dütsjland en i versjillende Midde- en Oeës-Europees leng tot de lokaal cuisine behure. I Limburg en i versjillende deler va Gelderland eët ze me óch. Wie me de keuk genauw maak en wat d'rbei weëd gegeëte, versjilt per lank en per regio.

Ingrediënte[bewirk | brón bewèrke]

Mit roeë gerieve eëpel, meël, ei en 'n ulgsjke weëd besjlaag gemaak, dat me eventueel nog kint kruje mit beivuurbild marjolein, peterselie, zaot en mesjoat. Van 't besjlaag weëde platte keuksjkes gemaak, die me doanoa broant i hete öal.

Traditie i Dütsjland[bewirk | brón bewèrke]

Riefkeuk zint populair i gans Dütsjland. In 't katholieke Rienland woeëde ze gegeëte óp vriedig, d'r traditionele vastedaag. Vleesj oot me neet óp deë daag, dös sjtónge döks beigerichte mit eëpel óp d'r dusj. Allewiel ist vuural 'ne wintersnack. Bekank zint de boede óp g'n kirmes of óp g'ne krismaat, oeë ze me döks same mit bruëdjes broadwoeësj en Glühwein verköp.

Benaminge[bewirk | brón bewèrke]

I Dütsjlank heesje riefkeuk Reibekuchen of Kartoffelpuffer. De ieësjte benaming is algeming, de letste benaming is vuural in 't noarde van 't lank gankbaar. I de res va Dütjlank heesje ze uëveral weer angesj. I Beiere en Franke zint variante mit Dotsch of get soatgelieks bekank, in 't zujelige Rienland (deelsjtaat Rienland-Palts) hant de benaminge döks 't wöadje kroompier i zich, wat 'n anger woad vuur eëpel is. I Luxemburg kalt me óch va Gromperekichelchen. I Kölle en i g'ne ganse Ripuarische dialektraum numt me ze Rievkooche, in 't Bergsje Land en 't Sauerland weer Riewekauke(n).

Wat me d'rbei eët, versjilt óch per sjtrieëk, zoeë eët me in 't Rienland en 't Münsterland de keuksjkes dök mit klatsjkieës, appelpoetsj, soms óch mit sjwatbroeëd en zeem. I Beiere is de combinatie mit zoermoos hiel populair.

Kölle[bewirk | brón bewèrke]

D'r riefkook gild same mit vasteloavend en d'r Kölner Dom es ee va de wichtigste koeltoereel symbole va de sjtad.[1] D'r Kölsje band Black Fööss hat in 1970 e leed gemaak mit d'r titel "Rievkooche Walzer".

Oeës-Europa[bewirk | brón bewèrke]

In Oeës-Europa weëde riefkeuk óch óp versjillende menere gegeëte, beivuurbild mit smetana (zoere room), klatsjkieës, paddesjteulsaos of vleesj. E vuurbild is d'r Tsjechische bramborák, deë ónger mieë mit paprikapoejer weëd gekroed. Soms deet me druëg woeësj of sjpek in 't besjlaag, mar alling es e neet es beigerech gegeëte weëd. Wie i Beiere, eët me geer zoermoos d'rbei.[2] I Pole zint de placki ziemniaczane mit goelasjsaos of zoere room e begrip. Fritoere weëde doa zelfs verneumd noa d'r snack.

Nederland[bewirk | brón bewèrke]

De keuk zint óch bekank i g'ne Achterhook, i g'ne Liemers en i g'n umgeëving va Nimwege. Doa heesje ze riefkuukskes, die óp de Rienlandse aat w(o)eëde gegeëte, dös mit sjwatbroeëd en zeem.[3] I Limburg numt me ze riefkeuk (i Heële) of reifkeuk. Döks weëde ze gegeëte mit versjillende saoze.

Zuuch óch[bewirk | brón bewèrke]

Óngersjtoande beigerichte zint hiel verwant mit d'r riefkook, wiewaal de receptoer of beriedingswies get angesj is:

Externe link[bewirk | brón bewèrke]

Brón[bewirk | brón bewèrke]

Commons
In de categorie Reibekuchen van Wikimedia Commons zeen media gerelateerd aan dit óngerwerp te vènje

D'r ihaod va dit artikel is gebaseerd óp deë van 't Dütsj corresponderend artikel.

Referenties[bewirk | brón bewèrke]

  1. Express.de - Köln hat gewählt „Mir wolle Rievkooche han“
  2. Ajvar.nl - Bramboráky
  3. Dekooktips.com - Reibekuchen
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Riefkeuk&oldid=425531"