Priorie Thabor
Dit artikel is gesjreve (of begós) in 't Bergs (Roerdale). Laes hie wie v'r mit de versjillende saorte Limburgs ómgaon.
Priorie Thabor is e klooster en veurmalige sjool in Berg ane Roer, gelaege aan Ane Berg 3. 't Klooster ligk op 'ne legen heuvel, kórtbie de Roer en naeve de Basiliek vanne H.H. Wiro, Plechelmus en Otgerus. Al in 1443 waerde hie e klooster gesjtich. Daonao volgde meer poginge, ónger meer door Jan van Abroek, meh de meiste hele neet zo lang sjtandj. In 1888 waerde de priorie oppernuuts opgerich en oetgeveurd in neorenaissancesjtiel. 't Geboew ómvatde ouch 'n maedjessjool, die toet 1960 in gebroek woor. In 1966 waerde de priorie zelfsjtenjig en kreeg ze d'n hujige naam. De naam vanne priorie verwies nao de Biebelsen Taborberg, dae juus wie de Kèrkberg vrie geïsoleerd in 't landjsjap ligk.
't Klooster waert bewoond door de Zösters van 't Heilig Graaf en is normaal neet toegenkelik. Heel aaf en toe vindj dao 'nen aopen daag plaats.[1]