Phil Dumoulin
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Phil Dumoulin (Mestreech, 1947) is 'ne Mestreechsen oteur, dee oetsletend in 't dialek sjrijf, en vaan 1996 tot 2003 veurzitter vaan de Veldeke-krink Mestreech waor. In 't daogeleks leve is heer lieraar Nederlands & Geschiedenis aon de PABO in Mestreech.
Wie zoeväöl dialeksjrievers begós Dumoulin zien carrièr in de vastelaovendswereld: heer sjreef de tekste veur de vereineging Miauw. Daonao, vaanaof de jaore tachteg, waor heer verboonde aon 't Mestreechs Volleks Tejater. Dit rizzelteerde o.m. in 't sjrieve vaan de komedie Boe is 't kinneke daan? (1984) en co-producties wie Royal Sphinx Revue (1987-88) en Nondedzju (1998). Ouch sjreef heer twie musicals: Mie fien mamzelke ('n vertaoling vaan My fair lady) en Iech en die vaan miech. Dees musicals, veural Mie fien mamzelke, weure allewijl tot d'n top vaan 't Mestreechs theater gerekend. In 1986 publiceerde heer 't book Sjöd miech nog eint in. Het dialect van Maastricht, gesjreve same mèt Jan Coumans. 'n Aander book, gesjreve same mèt Pol Brounts, waor Speulentere spelle, oet 1992, boe-in de basis vaan de Mestreechse spelling (noe door de Mestreechse gemeinteraod officieel gemaak) gelag weurt.
In 2004 brach heer, same mèt zenger Will Wintjes, 'n cd oet, getiteld Inkel Mestreech(s), wat e pleidoej, waor 't ouch mer ironisch, is veur 't Mestreechs chauvinisme.