Persjoenkele

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Persjoenkele is ein awt Limburgs woord mèt de beteikenis van sjienbaar in en oet loupe of euver en weer loupe. ’t Wirt ouch waal gebroek veur emes dae wat väöl op en neer löp.

Herkóms[bewirk | brón bewèrke]

't Woord persjoenkele is aafgeleid van 't Italiaans woord Portiuncula, wat perceelke beteikent. De naam verwies nao ein kapelke in ’t dörpke Portiuncula, vlakbiej Assisi in Umbrië, dat op ein gegaeve mement gans in verval waas geraak. De H. Franciscus in Assisi leet de kapel eigehanjig resterere. In dees kapel sjtórf hae midde tösje zien gezelle op 3 oktober 1226 en hae woort doa ouch begrave, wonao ’t ein bedevaartsaord is gewore. Allewiel is de kapel gans ingekapseld door de koepelkirk Basilica di Santa Maria degli Angeli, de basiliek in 't dal van Assisi die dao tösje 1569 en 1679 euverheen is geboewd.

Destieds verleënde Roame eine volle aflaot veur jederein dae dit kirkske bezoch (óm te baeje). Later woort dit gebroek veralgemeind zoadats te op bepaolde daag in 't jaor (Maria Hemelvaart, Allerziele) ouch in dien eige kirk mèt ein kirkbezeuk volle aflaote koosj verdene veur de zielkes in ’t Vagevuur en óm zelf eërder in de hemel te kómme. Väöl luuj gónge dan aeve baeje in de kirk, lepe ein blökske óm, of gewoon aeve róndj de kirk en dan weer nao bènne óm de volgende aflaot te verdene. Zoa sjprook me van doe aaf aan euver persjoenkele es emes wat dèks de kirk oet en in leep.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Persjoenkele&oldid=199085"