Nefertiti
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Nefertiti waor de Groete Keuninkleke Vrow (of hoofconsort/echgenote) vaan de Egyptische farao Amenhotep IV (later Akhenaten), en sjoenmojer vaan farao Toetanchamon. Amenhotep regeerde euver Egypte tijdens de 18e dynastie, vaan 1352 v. Chr. tot 1338 v. Chr., en daomèt keuningin tijdens de Amarna periode. 't Is good meugelek tot zie ouch op 'r eige regeerde oonder de naom Neferneferuaten, veur korten tied nao d'n doed vaan häöre maan en veur de troensbestijging vaan Toetanchamon. Häöre naom vertaolt ziech oongeveer tot "de sjoen (of perfecte) vrow is gekoume". Häöre naom liekent ouch op de aonduijing veur e soort verlengde gouwe kräölke, boemèt zie dèks aofgebeeld woort.
Zie is bereump gewore door häör buste, noe in 't Altes Museum in Berlien, hei rechs aofgebeeld. 't Beeld weurt towgesjreve aon de beeldhouwer Djhutmose. De buste is bezunder door 't inziech wat ze gief in de opvattinge die de Aw Egyptenere hadde euver gooj geziechsverhawwinge.
Zie had väöl titels, in Karnak zien inscripties die leze: Erfgenaome, Groet vaan Gunste, Bevaange vaan charm, Oetstraoler vaan Gelök, Meisteres vaan Beminnelekheid, geleefde, verzachter vaan 't hart vaan de keuning in dit hoes, zach sprekend in alles, meisteres vaan Opper- en Lieger-Egypte, Groete Keuningsvrow, boe heer vaan hèlt, Vrowwe vaan de Twie Lande, Nefertiti.
Zoewel d'n oorzaak vaan de doed vaan Nefertiti es ouch de plaots en tied zien oonbekind, meh op e gegeve momint weurt zie neet mie in 't openbaar gezeen. Gedach weurt tot zie in 1338 v. Chr. gestorve is, in 't 14e regeringsjaor vaan häöre maan. Es meugeleke oorzake weurt gedach aon ofwel moord of verstoeting, of 'n krenkde. Volges weer 'n ander theorie heet zie häöre maan euverleef, is zie hertrowd met 'ne prins oet 'n buurland en heet zie nog einege tied euver Egypte geregeerd.
Beuk um te leze
[bewirk | brón bewèrke]- J. Fletcher, Op zoek naar Nefertiti, Vianen - Antwerpen, 2005.
- Rita E. Freed, Yvonne J. Markowitz, Sue H. D'Auria, Pharaohs of the Sun: Akhenaten – Nefertiti – Tutankhamen (Museum of Fine Arts, 1999)
- Joyce Tyldesley, Nefertiti: Egypt's Sun Queen (Viking, 1999)