Mickey Mouse
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Mickey Mouse is 'n antropomorfe moes dee in 1928 is bedach door Walt Disney en Ub Iwerks. Heer späölt in 'n aontal korte teikefilmkes (iers in zwart-wit, sinds 1935 gans in kleur), zoewie in langer teikefilms (Fantasia, 1940), geteikende tillevisieseries en stripverhaole. Heer treujt op mèt zien vrundinneke Minnie Mouse, zienen aartsvijand Pete ('n antropomorfe kat; in 't Nederlands Boris Boef), Goofy ('nen dingo), 't paar Clarabelle Cow (Clarabella Koe) en Horace Horsecollar (Karel Paardepoot) zoewie mèt de neet-antropomorfen hoond Pluto. Ouch Donald Duck en dee zien vrundin Daisy (Katrien) koume dèks veurbij, meh die weure toch veural geteikend in hun eige universum.
In de ierste filmkes is Mickey Mouse nog 'n astrant batteräöfke, meh later weurt heer d'n archetypischen held dee alles veur Minnie deit en in alles doug. Heer is dao-in 't tegedeil vaan Donald Duck, dee dèks koed weurt en nogal ins get fout deit. In de stripverhaole treujt Mickey Mouse dèks op es detectief.
Mickey Mouse, en daan in 't bezunder 't filmke Steamboat Willie, waor 't ierste groet succes vaan Disney. Heer zouw oetgreuje tot 'n mascotte vaan 't ummer greujend imperium; zien iconisch silhouèt ('ne ronne kop mèt twie ron oere) zouw 't beeldmerk weure vaan 't gans bedrief. Oonder de Amerikaonse wèt zouw Mickey Mouse in zien ierste versie oersprunkelek in 2004 in 't pebliek domein koume. Door 'n speciaol wèt, aongenome in 1998 en dèks kritisch de 'Mickey Mouse-wèt' geneump, is dat mèt 20 jaor oetgestèld. Oetindelek woort Steamboat Willie mèt alle figure die drin veurkoume in 2024 pebliek. (Later versies vaan de figure zien nog wel besjermp.)