Marie-Louise Vaessen

Van Wikipedia
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Heëlesj, es te dit dialek sjpriks.

Marie-Louise Jean Joséphine (Marie-Louise) Vaessen (Mestreech, 19 miert 1928Haors, 15 fibberwarie 1993) waor 'n Nederlands-Limburgse zwumster. Häör specialiteit waor de vrije slaag. Ze behaolde häör groetste zwumsuccesse kort nao de Twiede Wereldoorlog en aon 't begin vaan de jaore viefteg.

Vaessen greujde op in Heerle. Huugdepunte oet häör carrièr waore de twie broonze medaljes bij de Olympische Speule vaan 1948 in Londe op de individueel 100 meter vrije slaag en de 4x100 meter vrije slaag. Op de Olympische Speule vaan 1952 in Helsinki behaolde ze 'n zèlvere medalje op de 4x100 meter vrieje sjlaag same mèt Hannie Termeulen, Koosje van Voorn en Irma Schuhmacher.

Häör ierste succes waor in 1947 bij de Europese kampioensjappe zwumme in Monte Carlo boe ze mèt de Nederlandse ploog 'n zèlvere medalje wón op de 4x 100m vrije sjlaag achter häör landgenoetin Irma Schuhmacher.
In 1950 kós ze bij de Europese Kampioensjappe in Wene dees prestatie verbetere door de gouwe medalje op de 4x 100 m vrieje slaag te winne same mèt Hannie Termeulen, Ans Massaar en Irma Schuhmacher en kós ze ouch nog 'n zèlvere medalje in de wach sleipe op 't individueel nómmer 100 m vrije sjlaag.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Marie-Louise_Vaessen&oldid=434128"