Lorettekapel

Van Wikipedia
(Doorverweze van Lorette)
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


De Lorettekapel bie Visé

'n Lorettekapel ies 'n kapel gewiejd aan Slevevrouw van Lorette. Vanaaf de 14e ièw zin in Europa euveral van diet soort kapelle gesjtiech op veursjpraok van 't Vaticaan.

Dees kapelle zouwe 'n replica zin van 't hoes woa-in Jezus van Nazareth opgreujde. Volges de legende zou diet ónderkómme nao de kruustochte door 'n Goddelik ingriepe vanoet Palestina nao Loreto bie Ancona (Italië) zin euvergevloge. Dao greujde-'n 't nao 1300 oet tot 'n populair baevaartsoord. 't Vaticaan in Roame haet toen besjlote um miè van diet soort Loreto-kapelle te sjtiechte en euver Europa te versjpreie.

Visé[bewirk | brontekst bewerken]

In Visé in Belsj, bevingk ziech op 'n huègde aan de rand van de beboewing de kapel van Slevevrouw van Lorette. Ze ies o.m. te bereike vanoet 't centrum via 'ne trap mèt 189 trae.
De röstig gelege plek ies 'n baevaartsoord. Achter de kapel liek 'n kèrkhof.

Boew[bewirk | brontekst bewerken]

De Lorettekapel, boewjaor 1684, ies einbeukig, gedèk mèt 'n zaaldaak. De moere zint opgetrokke van roa baksjtein mèt op de heuk helsjtein. 'n Horizontaal lies ies ouch van helsjtein. In de óndersjte verdeping ziete rechheukige vènstere. Op de zölderverdeping 'n róndbaogvènster. Bove op 't daak sjteit 'n Mariabeeld. Binne sjteit 'n gekroande Modergaods (Maria mèt kind). De kapel ies 'n rieksmonument. Neve de kapel sjteit nog 'n ander hoes (van de köster of toeziechhouwer) mèt 'n klökske op 't daak. Dit geboew ies ouch van baksjtein mèt helsjteine blök rónd de rechheukige vènsterkes.

Bolderberg[bewirk | brontekst bewerken]

In 't gehuch Bolderberg in de Belsj-Limburgse gemeinte Heuze-Zolder (Heusden-Zolder) liek de kloes van Bolderberg, 'n Lorettekapel oet 1673 die bewoond woort door 'ne kloezenaer.

Toear[bewirk | brontekst bewerken]

In Toear in de gemeinte Maasgoew in Nederlands Limburg liek de Lorettekapel van Slevevrouw ónder de linge. Dees kapel woort in 1673 gesjtiech door Clara Elisabeth van Manderscheidt-Blankenheim, de kanunnikes van 't sjtif van Toear. De kapel ies e rieksmonument. In de kapel sjteit 'n beeldsje van Maria mèt Jezus op de erm oet 1674.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Lorettekapel&oldid=339790"