Levalloistechniek

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Aofsloon volgens de Levalloistechniek

De Levalloistechniek is de term veur 'n 250.000 jaor aw techniek en methode um vuurstein aof te hawwe die woorte oontwikkeld door neanderthalers en aander aapechtege en oerminse oet 't Paleolithicum (de Awwe Steintied). De naom stamp vaan de Pariese boetewiek Levallois-Perret, boe op dees meneer gemaakde wèrktuug in de 19en iew woorte oontdèk tiejes archeologische opgravinge.

De levalloistechniek is 'n verfiende versie vaan ierdere vörm vaan steinbewèrking en umvatte 't ewegslaon vaan steinsjilvers vaan veurbewèrk kernstein. De wèrktuugmeker had zoe väöl mie controle euver de vörm en de groette vaan d'n oetindeleke sjilver. De techniek begint mèt 't keze vaan de zjuste stein, oongeveer zoe groet es 'n hand. Aon de eine kant vaan de stein weurt 'n sleegplak gecreëerd en langs de ren weure splinters aofgebötteld roond de umtrèk vaan de gewönste sjilver. Daonao weurt tege de basiek vaan de stein gebötteld um de kènmerkende dorsale richel te producere. Wie d'r daan tege de sleegplak weurt gebötteld, kump de sjilver mèt zien karakteristieke platbolle vörm los vaan de kernstein. De ren zien sjerp door 't ierder aofslaon vaan de splinters. De sjilver is veerdeg veur gebruuk es mets of speerpunt.

De levalloistechniek woort gebruuk door volkere verspreid euver e groet gebeed, vaan Zuid-Afrika tot Scandinavië. Door dees methode kóste de neanderthalers hun spere perfectionere, wat nötteg waor bij de jach op groete bieste. Groetere bieste kinne doeje en daodoor mie lui kinne voje wijl d'r minder tied aon de jach woort besteid, leide tot de vörming vaan stabiele minsegróppe en dat maakde 'n mie sedentair levensstijl meugelek. De levalloistechniek leide ouch tot de productie vaan sjerpe punte veur vreug boegsjeettechnieke. 't Feit tot dees techniek door de neanderthalers woort verfiend en geperfectioneerd toent aon tot 't populair beeld vaan primitief, weus aapechtege neet riechteg is.

Brón[bewirk | brón bewèrke]

  • Adam Patrick Taylor, Levallois technique, oet 1001 ideas that changed our way of thinking vaan Robert Arp & Arthur Caplan (Librero, Londe, 2014, p. 27)
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Levalloistechniek&oldid=405359"