Kuurne-Brussel-Kuurne

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Kuurne-Brussel-Kuurne (KBK) is 'n jaorlekse eindaogse fietsrenkoers. Ze weurt ummer d'n daag nao Omloop Het Nieuwsblad gehawwe, dus gemeinelek de negende zondag vaan 't jaor. De koers löp door 't zuie vaan de provincies Wes- en Oos-Vlaondere (door de Vlaomse Ardenne) en indeg ummer in Kuurne. Aanders es d'n Omloop huurt Kuurne-Brussel-Kuurne neet bij de UCI WorldTour; wel maak 't deil oet vaan de UCI ProSeries. Väöl renners doen aon allebei de koerse mèt; dèks pakke favoriete die hun rol in d'n Omloop neet höbbe woergemaak op dezen daag nog ins hun kans.

Kuurne-Brussel-Kuurne weurt sinds 1945 gehawwe. D'n datum heet door de jaore heer gevarieerd; neet ummer waor de koers zoe vreug in 't jaor. Vaan Kuurne nao Brussel en weer trök fietse deeg me allein in 't begin; 't parcours varieert per jaor. Brussel weurt allewijl neet mie aongedoon; startplaots waor de lèste jaore dèks Kortrijk. Allein de finish in Kuurne is door de jaore heer gebleve; allewijl heet me dao, wienie me bij 't dörp aonkump, iers nog e rundsje te fietse.

Sinds 2012 gief 't de zaoterdag deveur 'nen toertoch veur amateurs.