Knock-outsysteem

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


E knock-outsysteem is 'n meneer um groete toernoje te beslisse in sporte boe-in mer twie opponente (individu's of teams) direk tegenein kinne speule. In e knock-outtoernooj speule de tegenstanders ein of mie matche tegenein; wee de confrontatie wint, geit door nao de volgende runde, wee verluis, weurt oet 't toernooj gegoejd (vaandao de naom). Hei-in versjèlt 't knockpoutsysteem vaan de competitie en de round-robin, boe-in alle teams eveväöl matche speule.

Op toernoje vaan beperkde door speule de tegenstanders dèks mer eine match tegenein. Bij groete teamcups, die e gans jaor dore, geit soms 't euver twie wèdstrije - eine kier oet en eine kier toes, umtot me toes beter späölt - of weurt geloot welke club toes maag speule. Es me good d'n tied heet, kin volges e best of three-systeem weure gespäöld, mèt twie of drei matches. E vereisde aon knock-outsysteems is tot e geliekspeul neet meugelek is - eine moot es winner weure aongeweze en doorgoon nao de volgende runde (of 't toernooj in de finale winne). Dat vereis bij sporte die de meugelekheid tot geliekspeul kinne, wie voetbal, 'n aonvölling op de regele. Um zoe'n wèdstrijd te beslisse späölt me gemeinelek verlenging en/of penanties; soms weurt de verlenging gewoen mer euvergeslage.

Väöl toernoje bestoon neet gans oet e knock-outsysteem, meh combineren 't mèt 'n gropsfaas. Hei-in speule de clubs 'n competitie of round-robin en bepaole zoe wee doorgeit nao de knock-outrundes.

Op toernoje die gans mèt e knock-outsysteem wèrke, hoof neet edere deilnummer vaanaof 't begin mèt te doen. Dèks speule iers allein de liegs geklasseerde deilnummers tegenein; de op pepier beter deilnummers struime daan later in. Dit heet ouch es veurdeil tot de toernoojbezètting neet gefixeerd is op 'n mach vaan 2.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Knock-outsysteem&oldid=404187"