Kleisjtein

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

---

Kleisjtein is e klastisch sedimentair gesjteinte det veurnamelik oet geconsolideerde klei besjteit.

Aafzunjerlike kleideilkes (klaste) zeen in kleisjtein, juus wie bie óngeconsolideerde klei, kleinder es 2 µm en besjtaon oet kleiminerale wie illiet, smectiet of montmorilloniet. Maximaal 25% van 't totaalvoluum kan aevel oet anger minerale of angere materie besjtaon, wie kwarts, veldsjpaat, carbonate, glauconiet, chloriet, oxide of organische verbinjinge wie bitumen. Kleisjtein kan sjterk oetereinloupende kleure höbbe, aafhenkelik van de wieväólheid aan organische verbinjinge en de mineraalinhaad.

Wen e sedimentair gesjteinte det veurnamelik oet klei besjteit läögske (laminatie) haet wolangs zich 'n dudelike sjplieting vörmp, sjprèk me neet van kleisjtein, mer van sjalie.