Kaalhei

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Kirchröadsj, es te dit dialek sjpriks.

---

De ligking van Kaalhei in Kirkraoj.

De fóndamentje vanne Romeinse villa rustica ane Krichelstraot mit oppen achtergróndj de taorspits vanne Sint-Jozefkirk.

Kaalhei (Nederlandjs: Kaalheide) is 'n wiek in 't wèste vanne gemèndje Kirkraoj inne Nederlandjse pervinsje Limbörg. De wiek is 'n óngerdeil van 't stadsdeil Kirkraoj-Wès. De naam vanne buurt verwies nao 't ónbegreudj heiveldj det vreuger hie loog.

Kaalhei besleit 'n oppervlakdje van 90 hektaar en haw 2.890 inwoeaners in 2008.

Kaalhei grens in 't zuje aan De Jraat, t'n naorde bevindj zich 't industrieterrein Dentgenbach, t'n oeaste 't centrum van Kirkraoj en t'n wèste ligke Terwinsele en De Heilust.

Kaalhei is bekèndj door 't Gemeintelik Sportpark Kaalhei wo de eredivisievoetbalclub Roda JC toet 2000 speeldje. 't Hermenieorkès "St. Jozef" Kaalhei Kirkraoj is ei vanne toeanaangaevendje hermenieorkèste in Nederlandj. De Sint-Jozefkirk woort in 1927 geboedj nao 'n óntwirp vanne arsjitek Hubert van Groenendael.

Ouch ligken in dees wiek ane Krichelstraot de fóndamentje van 'n Romeinse villa rustica: de Romeinse villa Kaalhei. Ane zuudkantj vanne Kaalhei ligk de baek Vloedgraaf en t'n oeaste vanne wiek ligk 't daal vanne Anstelerbaek, wo de villa hoeag baove ligk. De villa ligk mitte wiek Kaalhei op 't Plateau van Sjpekhei.