Kaag

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan de kern Kaag in de vreuger gemeinte Alkemade, die in Kaag en Braassem is opgegaange.

Kaag (lokaol De Kaag) is 'ne polder en e dörp in de Nederlandse gemeinte Kaag en Braassem. De polder vörmp 'n eiland in de Kagerplasse en ligk nog zjus in de provincie Zuid-Holland. 't Dörp had op 1 jannewarie 2021 465 inwoeners.

Historie

't Dörp weurt veur 't iers geneump in 1308. 't Toponiem kaag/koog beteikent zoeväöl wie 'boetedieks land'. Door de iewe heer waor dit gebeed neet zoe prominent, al waor 't langen tied wel 't economisch centrum vaan de hierlekheid Alkemade.

Pas in de negentienden iew veraanderde de positie vaan 't dörp. Mèt 't droegvalle vaan d'n Haarlemmermeer laog de polder neet mie zoe geïsoleerd; mèt de veerpoont kós me direk nao en vaan 't vasteland. Direk neven 't dörp, in d'n Haarlemmermeer, oontstoont 't gehuch Buitenkaag. In 1849, roond d'n tied tot deze polder veerdeg kaom, vestegde ziech de sjeepswerf Van Lent (noe Keuninkleke Van Lent) op 't eiland. Later, zoe roond 1900, woort 't dörp populair bij sjèlders. In d'n twintegsten iew oontwikkelde ziech de watersport op en roond 't eiland. Heidoor woort 't toerisme belaankrieker; ouch greujde 't ummer zoe klei dörpke get door d'n instruim vaan rieke forenze.

Aonzien

Kaag besteit veur e klei deil, wat zoeget samevèlt mèt de noordweskant vaan 't eiland, oet dörpsbebouwing. De klein eilendsjes Vogelskamp en Faljeril, die kort neven 't dörp ligke, zien ouch bebouwd. Ze valle neet oonder Kaag meh hure bij de gemeinte Teylingen (woenkern Warmond). De diverse aander poldereilen in de Kagerplasse höbbe allemaol gein dörp, hoegoet e klei buurtsje en dèks mer ein boerderij, ouch al zien ze in umvaank mèt Kaag te vergelieke.

Vaanajds gaof 't mer ein dörpsstraot. In d'n twintegsten iew, wie de mèt de nuibouw nui straote kaome, kraog die straot de naom 'Julianalaon'. Aon die straot ligk 'n aontal monumentaol boerderije en woenhuiskes. 't Gief ouch 'n kèrk oet 1874, die 'n awwer kèrkske oet 1618 vervingk.

't Dörp weurt gedomineerd door de loods vaan de Van Lent, die vaan wiedaof in de umgeving te zien is.

Economie

Opvallendste werkgever is de keuninkleke Van Lent sjeepswerf, boe megajachte weure gebouwd veur (dèks boetelandse) multimieljonaire. Wijer economische factore zien 't toerisme en nog ummer de landbouw. De mieste inwoeners wèrke evels boeten 't eiland. Restaurants en zoe gief 't in euvervlood; gewoen winkele gief 't koelek. Veur kemissies mote de bewoeners dus 't eiland aof.

Verveur

Neve de groete veerpoont nao de Haarlemmermeer gief 't in de zomer nog e vootveer wat vaanoet Zevenhuizen (bij Oud Ade) nao 't eiland veurt. Väöl bewoeners höbbe 'n eige boot. Me maag mèt d'n oto 't eiland op, al veurt de ing Julianalaan neet ech gemekelek.

Printsjes

• 
  Dörpskèrk
• 
  Dörpsstraot (Julianalaan)
• 
  Boot vaan Kaag nao de Buitenkaag
• 
  Gevelkes (straot- en waterkant)