Jutlandj

Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.

---

'n Kaart van Jutlandj.

Jutlandj (Deens: Jylland; Duutsj: Jütland) is e sjiereilandj van 't Europees vastelandj. 't Naordelik deil behuèrtj toet Denemarke en 't zujelik deil toet Duutsjlandj en vèltj ónger de deilstaot Sleeswiek-Holstein.

Jutlandj grens in 't wèste aan de Naordziè, in 't naorde aan 't Skagerrak en in 't oaste aan 't Kattegaat en de Kleine Belt.

't Naordelikste deil van Jutlandj weurt gevörmp door 't eilandj genaamp Vendsyssel-Thy. Dit weurt van de res van Jutlandj gesjeie door de Limfjord. 't Eilandj is aevel pas in 1825 óntstange en is op mièrder plaatse euver de waeg vanaaf de res van Jutlandj te bereike.

Jutlandj is tièmelik vlaak mit lièg heuvele en vièngrunj. 't Deens deil haet 'n oppervlaakdje van 29.775 km² en 'n bevölking van 2.500.000 (2007) luuj.

't Zujelik deil, Sleeswiek-Holstein, waas aafwusjelendj in Deens en Duutsj bezit. De litste bezitsverangering vónj plaats nao d'n Ièrste Waereldkrieg, doe bie vouksstumming e deil van Sleeswiek nao Denemarke is euvergegange.

Jutlandj dank ziene naam aan de Jute, 'ne Germaansje vouksstam dae zich in de viefdjen ièf in 't gebeed dièj vestige.

Groate stej in Jutlandj zeen Aalborg, Aarhus, Esbjerg, Flensburg, Horsens, Kiel, Kolding, Randers, Ribe, Tønder en Vejle.