Jean Meijntz

Van Wikipedia
Gank nao: navigatie, zeuke

Dit artikel is gesjreve in 't Gelaens. 't Weurt gewaardeerd óm in dit artikel 't Gelaens aan te hauwe of aan te gaeve welk anger dialek gebroek is.


Jean Meijntz (Gelaen, 27 september 1946), is eine Limburgse autoriteit op carnavalsgebeed. Hae sjrief ouch verhaole en vastelaovesleedjes. In Limburg geneet hae groate bekèndheid door zien väöle insjpanninge die hae deeg en deit veur de Limburgse vastelaovend.

Biografie[bewirk | brontekst bewerken]

Carnaval is de in Gelaen gebaore en getaoge Jean Meijntz mèt de paplaepel ingegaeve. Zoa-es hae zelf zaet: Ich bèn al mien heële laeve mèt carnaval bezig. In mien mojers boek waas ich d'r al van aan 't aete en 't drènke. In 1947 waas zien vader Giel ein van de medeoprichtesj van de Sjtadsvastelaoves vereiniging 'De Flaarisse' in Gelaen. Hae woort vanaaf de 1960-er jaore actief op allerlei gebeed in en róndj de vastelaovend. In 1968 woort hae zelf oetgerope tot Sjtads Prins Jean II van de Waereldsjtad. Hae is al meë es veërtig jaor op allerlei gebeed in 't carnavalsgebeure actief en wirt inmiddels in heël Limburg, in de Duutsje grensjtreek en Belsj besjouwd es dé carnavalskènner biej oetsjtek.

In 1992 is Jean de initiatiefnummer en organistor - mèt hölp van 't Kreatief Centrum in Gelaen - van de cursus Bütteredner. De cursus woort gegaeve in 't wiekcentrum Het Plenkhoes in Gelaen Zuid wo Jean in die daag de beheërder waas.

Jean nóm diverse maole deil aan 't Gelaens Vastelaovesleedjes Konkoer. Hae sjreef en zóng väölal zien eige leedjes, wovan 't bekèndste Klein cafèke in 1994 op de CD Gelaen Alaaf is versjene. Ouch stóng hae mèt ein zekere regelmaot zelf in de buut óm 't Gelaense sjtadslaeve op de hak te numme.

Jean promeveerde aan de in 1995 opgerichde Limburgse Narre-universiteit in Mesjtreech, de NUL en beheuërde daodoor es prefesser tot ein biejzunjer gezelsjap cultuurdragesj van de vastelaovend.

Ouch waas hae ónger angere besjtuurslid van de LVKA (Limburgse Vereniging van Karnavals Artiesten) en maakde hae radio-oetzendinge veur de regionale zender L1 euver carnavalsmusea in Europa.
Dees lètste activiteit deeg häöm besjloete zien bevènjinge vas te lègke in ein book, namelik Vastelaovend in een museum. Hiejin geuf hae ein enorme hoeväölheid aan infermatie die hae vergaarde in de 20 musea die hae bezoch tiedes zien zeuktochte door Europa.

Vanwaege zien bekèndheid sjpruk hae nog ummer regelmaotig veur de regionale radiozenders, mèr is hae ouch regelmaotig te beloestere biej de lanjelike radio zenders.

Sjriever[bewirk | brontekst bewerken]

De lèste jaore geneet hae groate bekèndheid vanwaege de oetgaaf van zien beuk euver carnaval.
't Book De Bütt en de Büttenredner haet hae in 1997 gesjreve nao aanleiding van de drie buutreednersjoale die hae haet opgezat in Nijmege, Gelaen en Aoke. In dit book haet hae veural väöl informatie gegaeve euver de gesjiedenis van de bütt, algemein informatie euver de carnaval en ein recent euverzich van Limburgse buutreedner.
In 2003 versjeen zien book De nar en hofnar in de akademische karnaval. Dit book lieët zeen dat d'r naeve de optochte, vastelaovend, buutreedne en dergelike, meë besjteit róndjóm de carnaval, namelik narre-rechbanke, narre-academies en narre-universiteite, die oetgebreid waere belich in dit book. Nao aanleiding van de publicatie van dit book promeveerde hae opnuuj aan de narre-universiteit Limburg.
Jean haet ein biezunjere poszegelverzameling opgeboewd mèt es thema: Karnaval in de Filatelie. Dees verzameling stelt hae inmiddels tentoan in Sittard, 's-Hertogenbosch en Groenlo en ze reis ouch bènnekort nao 't boetelandj. Nao aanleiding van zien verzameling haet hae in 2006 zien book Karnaval in de Filatelie oetgebrach. Meyntz sjreef ónger angere ouch dertieën carnavalsleedjes en versjillende carnavalsbute. Hae sjtóng zelf ouch ach jaor in de buut.

Óngersjeijinge[bewirk | brontekst bewerken]

Meijntz woort in Belsj en Duutsjlandj al versjillende keëre geieërd veur zien biedrages aan ’t carnavalsgebeure. In 't Duutsje Neukirchen-Vluyn woort hae oetgerope tot Spasvogel des Jahres. Ouch óntving hae de hoagste óngersjeijing van 't Schwäbisch-Allemannisch insjtituut, 't awtste narre-insjtituut van Duutsjlandj en hae woort tiedes 'ne gala-aovend van de Aachener Karneval Verein 1857 gehöldigd vanwaege 't succesvol doorloupe van de buuttereednersjoal.
In 1996 óntving hae vanwaege zien biezunjere verdeenste de Piet Giesberts herinneringsmedaje, de jaorliks hoagste óngersjeiding van de Vastelaovesvereiniging 'De Sjoutvotte' oet Gelaen.
In 2005 woort Jean Meijntz in zien eige sjtad geieërd mèt de 'Orde van d'n Aafgebrende Gaaskaetel, de 'Hoesorde' van carnavalsvereiniging De Flaarisse, vanwaege zien biejzunjere verdeenste veur de Gelaense vastelaovend.

Bibliografie[bewirk | brontekst bewerken]

  • Laoker völle, lachverhaole in 't Gelaens (LiLiLi 16).
  • De Bütt en de Büttenredner, uitg. 1997.
  • De Nar en de Hofnar in de Akademische Karnaval, uitg. 2003.
  • Van Carrus Navalus tot Blauw Schuit, uitg. 2004.
  • Karnaval in de Filatelie dl. 1, uitg. 2006.
  • Alaaf en alleluja, kerk en karnaval, uitg. 2007.
  • Laach, kortverhaole en inleiding euver humor dör Jean Meijntz, diverse auteurs, 2008 (LiLiLi 63).

Externe links/brónne[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Jean_Meijntz&oldid=350166"