James Cook
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
James Cook (1728-1779) waas 'nen Ingelsen óntdèkkingsreiziger. Cook waas van aafkóms 'ne boerezoon dae deens noom bie de Ingelse marine en tróch veur 't eers d'n aandach door zie veurtrèffelik cartografisch werk t'n behoof van de Ingelse actie in Canada tiedes de Zevejäörigen Oorlog (1756-1763). Zien bekwaamheje es cartograaf en astronoom brachte 'm t'n slot d'rtoe in deens te traeje van de Royal Society, die 'm drie grote reize leet óngernumme.
Aafgezeen van zien grote óntdèkkinge, die ouch de gróndjsjlaag veur 't Brits Riek in Australië en Oceanië lagte, berös Cook zien bekèndheid op zien prestaties op nautisch, astronomisch en cartografisch gebied en op 't feit det t'r es eerste doeltrèffende dieetmaotregele (zoermoos) taenge sjeurboek wis te vinje. Daonaeve zeen Cook zien expedities door de aanwezigheid van óngerzeukers ouch van groot belang gewaes door de nuuj kènnis die op väöl versjillende gebiede waerde verzameld.