InSight

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


InSight Lander

InSight (aofkorting vaan Interior Exploration using Seismic Investigations, Geodesy and Heat Transport) is 'n missie vaan de NASA um de inwendige struktuur vaan Mars te oonderzeuke. De lancering voont plaots op 5 mei 2018, 11:05 UTC, vaanaof de Vandenberg Air Force Base in Californië, VS. De landing voont plaots op 26 november 2018, 9:52:59 UTC.

Achtergroond[bewirk | brón bewèrke]

Ieder Mars-missies höbbe ziech altied geriech op 't oppervlak vaan Mars. Heidoor is 't nog neet meugelek gewees um oonderzeuk te doen nao de vreuge historie vaan Mars, wat allein kin door deep oonder 't oppervlak te kieke. Umtot Mars gein platetektoniek heet is de historie nog good vasgelag in de koors vaan de planeet. Door de gruutde, diechde, algemeine struktuur vaan de kern, de mantel en de koors te bestudere, esouch de meting vaan wieväöl wermte oet 't midde vaan de planeet opstijg hoop me inziech te kriegen in de evolutionair processe vaan alle rotsechtege planete in 't zonnestèlsel.

Ruimtetuig en laojing[bewirk | brón bewèrke]

InSight mèt instruminte

InSight maak gebruuk vaan 't succesvolle ontwerp vaan de Phoenix-ruimtesonde oet 2008. Umtot InSight kort bij d'n evenaar zou lande weurt gebruuk gemaak vaan zonnecelle um de lander vaan energie te veurzien tijdens de twie jaor dorende missie (oongeveer ein Marsjaor). InSight is oetgerös mèt 'n aontal meetinstruminte, de belaankriekste zien:

  • SEIS (Seismic Experiment for Interior Structure): bedoeld um perceis metinge oet te voere vaan seismische activiteite (zowie bevinge);
  • HP3 (Heat Flow and Physical Properties Package): bedoeld om wermtestruiminge te mete. Dit gebäört door 5 meter deep de Marskoors in te baore;
  • RISE (Rotation and Interior Structure Experiment): bedoeld um mèt behölp vaan radiogolve zier perceis (mèt 'n nauwkeurigheid vaan 2 cm) de drejjing vaan Mars te kinne bepaole.

Same mèt de lander zien twie CubeSats gelanceerd, geneump Mars Cube One (MarCO A en B). Zie zien oontworpe um de telemetrie vaan de lander zoe gaw meugelek nao de landing nao de Eerd te sjikke. Umtot zie zelf gein aondrieving höbbe zien zie neet in 'n baon um Mars terechgekoume mer langs de planeet gevloge. Zie höbbe wel deveur gezörg tot binne ach minute bekind waor tot InSight geland waor. Mèt de satelliete die um Mars drejje zouw dat mie es 'n oor gedoord höbbe. 't Is d'n ierste kier tot CubeSats zien gebruuk bij 'n aander planeet.

Details vaan de missie[bewirk | brón bewèrke]

De oersprunkeleke lancering stoont gepland veur 4 miert 2016, mer woort oetgestèld in december 2015 umtot 't SEIS-instrumint 'n leek bleek te höbbe.[1] Oetindelek voont de lancering plaots op 5 mei 2018 um 11:05 UTC vaanaof Vandenberg Air Force Base in Californië. 't Is hoegs oongebrukelek um interplanetair missies vaanoet Californië te lancere, mer umtot de laojing neet zoe zwoer waor, waor dit veur InSight gei probleem, de extra slinger door de drejjing vaan de Eerd vaan 'n lancering vaan 't zuieleker gelege Cape Canaveral waor neet nudeg. Nao 'n oor in 'n parkeerbaon woort de Centaur-motor gestart um de baom um de Eerd te kinne verlaote. Nao anderhaaf oor woort InSight en de twie MarCO's losgekoppeld.

Nao 'n reis vaan 6,5 maond voont de landing vaan InSight plaots op 26 november 2018 um 9:52:59 UTC in 't gebeed Elysium Planitia, op oongeveer 600 km vaan de plaots boe de Curiosity-lander is geland.

Nao de landing zal 't oongeveer 3 maond dore um alle instruminte gereid te make veur gebruuk. De missie zal daonao zoe'n twie jaor dore.

Externe link[bewirk | brón bewèrke]

Rifferenties[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=InSight&oldid=462404"