IKL
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
't IKL, aafkorting veur sjtiechting veur 't Insjtand houwe van Klein Landsjapselemente in Limburg, ies 'n sjtiechting, die ziech bezig hèlt mèt 't beware, conservere en ónderhouwe van klein landsjapselemente in Nederlands Limburg.
Veurbeelde van die elemente zint: grave, 't sjnoeie en insjtandhouwe van deunehègke, hol waeg, dolines, brónkump, kalkgrasland, waeg- en veldkruzer, kapelle, bakhuuskes, drinkpeul veur 't viè, sjnoeie en aanplant van hoagsjtamfruitbuim, sjnoeie van bloomrieke natuurterreine, euversjteek-faciliteite veur kwakkerte, salamandersj en dasse ónder of euver verkièrswaeg, ingeng van mergelgroeves. De sjtiechting wèrk gedeiltelik mèt vriewilligersj en geuf cursusse in bv 't good sjnoeie van buim, sjtruuk en hègke.
Eder jaor vingk d'r 'ne landelike Natuurwèrkdaag plaats, dé daag veur jónk en oud um in de natuur te helpe en te wèrke.
Publikaties
[bewirk | brón bewèrke]Neve jaorversjlage, cursusmappe euver landsjaps- en natuurbeheer en diverse foldersj en brochures publiceerde IKL:
- Beukske mèt wandel- en fietsroutes langs hoagsjtambóngerde in Zuud-Limburg.
- Book: "Natuur op eigen erf", mèt 'n euverziech van de versjillende Nederlandse landsjappe en hun óntsjtoon en 'n euverziech van de meugelikhede um de eige tuin in te riechte.
- 'n Beukske "Poelen" geit euver Waterpeul.
- "Leestekens van het landschap", 188 landsjapselemente, gezeen vanoet hun cultuurhistorisch perspectief, zoa-es de algemein bekènde elemente: sjluze, watertores, kesjtièle en boerderieje, meh ouch pingoruïnes, sjtelberg en houtakkersj. Väöl aandach veur de regionale en lokale variant.(ISBN 90-7124-520-9)
Trivia
[bewirk | brón bewèrke]In september 2006 woort op de ièrsjte Nederlandse landsjapsveiling van klein landsjapselemente in Reymersjtok €100.000 bie-eingebrach.