Hoes Vliek

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

Hoes Vliek ligk in 't dörp Ulesjtraote, allewiel 'n deil van de Nederlands Limburgse gemeinde Maersje.

Besjrieving van 't kesjteël

't Hoes, gelaege aan de oasflank van de Wiengaardsberg, is 'n witgepleisterd tweëlaags hoes in Lodewijk XIV-sjtiel, oetgeveurd mèt pilasters en 'n róndj midderisaliet. 't Woort geflankeerd door tweë zievleugele die bie ein verboewing in 1908 zint toegevoog. Achter 't hoofgeboew is 'n bènneplaatsj die ómsjlaote wirt door 'ne kesjteëlhaof aan de noordziej en tweë vleugele aan de euverige zieje, waovan eine vleugel 'n koetsjhoes haet. Zoawaal d'n haof es ouch de tweë vleugele zint oet róndj 1800. 't Interjäör van 't heërehoes is oetgeveurd mèt 'n ovaal hal en haet 'n aantal sjtöcdekeraties in Lodewijk XVI-sjtiel. Naeve 't hoes ligk 'n park mèt tweë vievers, aangelag in 't begin van de 20e eëuw es 'n verfraaijng van 'n awwer landjsjapspark oet circa 1800. Eine van de vievers haet in 't midde 'n eilandj. Wiejer zint d'r in 't park 'n badhuuske, 'n ornementeel brök en 'ne zónnewiezer.

Gesjiedenis en beweuners

't Oarsjprunkelike kesjteël woort veur 't eësj geneump in 1374 ónger de naam "Hoes de Dael" en waas beweund door 't ridderlike gesjlach Van Vlieck. Hun börch zou op 't eilandje in de hujige viever höbbe gesjtaon.*) Bekènd is dat Arnold en Willem van Vlieck in 1371 mètvechde in de sjlaag bie Baesweiler ónger de drossaard van Valkeberg. Wiejer besjteit 'r 'n dokkemènt wao-in in 1468 sjprake is van jónker Kuende van Vlieck, dae "bie Vleke 8 bundere akkerlandj pachde van de veer meisteresse van de begienhof bie Mesjtreech".

De börch, die in de zevetieënde eëuw tot 'n rëwien waas verwore, woort door 'n neet naoder bekènd zeende Mesjtreechse femielie gesjloop en op de plaatsj van ’t hujige kesjteël woort ein modern heërehoes geboewd. Dit hoes woort róndj 1725 in opdrach van de Mesjtreechse gemeintesecretaris en börgemeister Mathias Karel de Lennaerts verboewd tot 't geboew zoa-es dit 'r taengewoordig nog sjteit. In 't begin van de 18e eëuw woort 't hoes aangekoch door Jean-Baptist Schoenmaeckers, en rieke heërboer oet Ulesjtraote en rentmeister van Sint Gerlach. Hae leet de eërder geneumpde verboewinge en de oetbreijinge aan 't kesjteël oetveure. Schoenmaeckers waas getrouwd mèt 'n dochter van 't gesjlach Coenegracht dat zetelde op 't Hoes Hoogenweerth bie Mesjtreech. Door 'n huwelik van de kleindochter van Schoenmaeckers kaom 't kesjteël in bezit van de femielie Houben, die 't kesjteël aevel door geldjnoad weer verkoch.

De nuuje eigenaer woort Robert Marcel Arnold Magnée, börgemeister van Häör dae ouch al 't Kesjteël Häör in bezit haw. De ènnige dochter van Magnée trouwde mèt jónkheër Peter Maria Frans van Meeuwen, president van 't gerechhof in 's-Hertogenbosch. De femilie van Meeuwen bleef eigenaer van 't kesjteël tot hauverwaege de 20e eëuw, toen de lètste van Meeuwen, taeves börgemeister van de gemeinde Baek, overleej en 't kesjteël laeg kaom te sjtaon.

't Heje

't Kesjteël woort oeteindelik aangekoch door 't Teikyo, 'n Japans Privé Universiteit die internationaal opereert en die 't kesjteël gebruukde es internaat veur Japanse maedjes die in Limburg sjtudere. 't Internaat is tensjlotte opgeheve en noe wirt 't kesjteël gerèstereerd.

Noot

*) 't Verhaol dat de börch op 't eilandje in de hujige viever zouw höbbe gesjtaon, berös op ein fabeltje. 't Eilandj is mèr 10 maeter in doorsjnee en is pas aangelag bie de verfraaijng van 't landjsjapspark in 'begin van de 20ste eëuw.

Bron

Euverzètting oet Wiki nl