Hoes Zevere

Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Mestreechs, es te dit dialek sjpriks.

.

Hoes Zevere, de veurbörch mèt 't paortgeboew

.

Hoes Zevere is gelaege in ’t dorp Amby dat deil oetmaak van de gemeinte Mesjtreech.

Besjrieving van 't kesjteël

't Hujige kesjteël is 'n ómgrach heërehoes mèt 'n wolfdaak en is in 1742 geboewd door Godaert van Slijpe op de plek van 'ne laatmiddeleëuwse veurganger. Euver 'n baogbrök haet me toegank tot 't hoes via 'n paort mèt 'n gebeeldhouwde ómliesting in Lodewijk XV-sjtiel, wo-in 't alliantiewaope van de femilies Van Slijpe en Van Bogaert is verwirk. De achtergaevel mèt dao-in 'n terras mèt hèlsjteine balustrade, haet ’n midderisaliet mèt aafhangende guirlandes en daobaove 'n daakerker wo-in aan de top 'ne óngerbraoke fronton wo 'n ovaal zöldervinster in is aangebrach. Aan de ziejkantje van 't hoes bevènje zich in 1880 aangeboewde veranda’s en aan de tuinziej 'n portiek mèt döbbelzule. Inwèndig haet 't hoes 'n riek régence-interieur.

Bie 't hoes ligk 'n wit gepleisterde veurbörch mèt gesjlaote haof oet de 17e eëuw. 't Paortgeboew is oet 1647 en is in 1700 verheuëgd en veurzeen van 'n koepeldaak mèt 'ne lantaere. 't Haet 'n ingezjwenkte gaevel wo-in 'n fronton is aangebrach. In 't fronton is 'n waopesjtein van de familie Pain et Vin zichbaar.

Aan de weskantj ligk eine in landjsjapssjtiel ingerichde tuin oet 1880.

Gesjiedenis en beweuners

De gesjiedenis van Hoes Zevere haet ziene oarsjpróng in de late middeleëwe. 't Hoes waas toen in bezit van de femilie Van ’t Zievel. Van dees femilie is de naamgaeving aafkómstig; Zevere is ein verbastering van Zievel wat zoavöl beteikent es drassige gróndj, de gróndj wo 't oarsjprónkelike kesjteël op geboewd waas. Nao de femilie Van ’t Zievel kaom 't hoes achtereinvolges in bezit van de femilies Van Strijthagen, Rietraet, Pain et Vin, Van Slijpe en Stevens.

Godaert van Slijpe waas in 1742 degene dae 't hujige hoes haet geboewd. Stevens waas 'ne rieke Mesjtreechse industrieel dae 'n aantal verangeringe en oetbreijinge aan 't hoes leet oetveure en 't landjsjapspark leet aanlègge.

't Heje

In 1912, naodat Stevens kènjerloos waas gesjtórve, vestigde de Zusters De la Miséricorde d'r 'n gesjtich veur verlaote en verwaarloosde kènjer. In 1986 woort 't complex door de Woningvereniging Maasvallei aangekoch en leet de benejeverdeping resterere in de awwe luuster en richde op de baoveverdepinge appartemente in. In 1997 vestigde de verpleegkleniek De Zeven Bronnen zich in 't hoes.

Bron

Euvergezat oet Wikipedia NL