Hoagbaekske
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
't Hoagbaekske (Nederlands: Hoogbeeksken) is ein van de ziebaeke van de Gelaenbaek.
Dit klein baekske óntsjprink oet ein bron op 't Hoagveldj, gelaege baove Sjpawbaek, en löp aan de oaskantj van 't dorp. Zie haet óngerwaeg nog ènnige ziebaekskes die oet diverse anger brónne óntsjprènge. Biej väöl raengeval wirt hemelwater van de hellinge opgevange in drie klein vergaarvievers, die via 'ne euverloup in 't baekske sjtreuëme. 't Baekske sjtreuëmp tösje de hellinge van 't natuurgebeed Sjpawbaekerbosj en de hoezer aan de Sjpawbaeker Dörpsjtraot en de Klipsjtraot en kruus dees sjtraot op ein gegaeve mement via ein óngergróndjse rioolpiep. Biej ein vootpaedje aan de Soppesjtraot wirt 't weer zichbaar, kruus die sjtraot vervolges óngergróndjs en löp dan door de weije aan de euverkantj richting 't buurtsjap De Aw Kirk. Alveures dat buurtsjap bereik wirt kruust 't baekske aevel eësj nog de autowaeg A76 en de spaorlien Heërle-Zitterd via 'ne duker. Biej De Aw Kirk löp 't dan richting 't Retraitehoes wo 't in de Gelaenbaek oetmóndj.
't Baekske haet ein totale lengde van óngeveër 3 km en is euver ziene ganse loup neet väöl breijer es eine hauve maeter.