Hertog Jan

Van Wikipedia
Naar navigatie springen Jump to search
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Árses, as te dit dialek sjpriks.

De Hertog Jan-brouwerij in Árse.

Hertog Jan is e Limbörgs beermerk, geneump nao de gelieknaomege brouwerij in Árse (Arcen) boe e deil vaan 't beer ouch gebrouwd weurt. Hertog Jan maak deil oet vaan AnheuserBusch InBev, de groetste beermaotsjappij vaan de wereld. Veurheer stoonte beer en brouwerij bekind es Vriendenkring.

Historie[bewirk | brón bewèrke]

Stoombierbrouwerij de Vriendenkring weurt op 2 miert 1915 gestiech door veer bevrunde brouwers oet Noord-Limbörg. De veer beginne allein pèls te brouwe, 'n beersoort die in deen tied sterk in opkoms is. In en nao d'n Twiede Wereldoorlog kump de brouwerije evels in financieel probleme, ouch al umtot de lui minder beer drinke. In 1949 weurt alles verkoch aon brouwerij De Drie Hoefijzers oet Breda. De nuien eigeneer leet de brouwerij in 1956 modernisere en handhaaf 't beermerk. In 1968 weure De Drie Hoefijzers zelf euvergenome, door 't Brits Allied Breweries Ltd. De zaak kump neet vaan de groond en 't beer weurt wieneg gedroonke. In 1980 doen de Britte de brouwerij touw.

In 1981 beslete drei brouwers de Ársese brouwerij nui leve in te bloze, oonder de naom Arcense Stoombierbrouwerij. In plaots vaan pèls, wat noe in de Oranjeboom-brouwerij weurt gemaak, goon de drei ziech touwlègke op speciaolbeer. In 1992 weurt dees oondernumming ouch ingelief door de Verenigde Bierbrouwerijen Breda-Rotterdam/Allied Breweries Nederland, e jaor later officieel umgeduip in Oranjeboom. Dit geit in 1995 weer op in Interbrew (later InBev, nog later AB InBev).

De groete commerciële doorbraok kump in 1998, es de naom in Hertog Jan weurt veranderd. 't Beer is noe geneump nao hertog Jan I vaan Braobant, dee volgens de euverlievering väöl vaan beer heel. Door 't gebruuk vaan dees en aander middeliewse associaties (beveurbeeld gotische lètters in 't logo) mèt 't beer ziech e historisch, 'othentiek' imago aon. 't Beer weurt oetgebreid mèt tv-reclaam in de merret gezat, en raak in gans Nederland populair.

Complex[bewirk | brón bewèrke]

't Hertog Jan-complex ligk eve noordelek vaan 't dörp Árse (in de riechting vaan De Loj/Wellerlooi) besteit oet 'n rillatief klein brouwerij mèt aonligkende winkel. Me kin ziech in groppe door 't complex laote roondleie. Daotegeneuver, aon d'n aandere kant vaan de weeg, ligk 'ne kaffee boe de Hertog Jan-bere gesjöd weure. Bij wijs vaan reclaam löp vaanoet de brouwerij 'n piep direk nao de kaffee. 't Beer wat daodoor struimp, kump evels neet oet de brouwerij: 't pèls vaan Hertog Jan weurt noe zjus neet in Árse meh in Dommelen gemaak.

Produkte[bewirk | brón bewèrke]

  • Hertog Jan pèls
  • Hertog Jan bokbeer
  • Hertog Jan dóbbel
  • Hertog Jan Grand Prestige — 'n geerstewien
  • Hertog Jan Karakter — dóbbelbeer mèt neve geerstemaajt ouch terfzètmeel
  • Hertog Jan Lentebock
  • Hertog Jan Oerblond
  • Hertog Jan tripel
  • Hertog Jan Weizener — bloondbeer mèt neve geerstemaajt ouch terfzètmeel

Extern links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Hertog_Jan&oldid=410156"