Harry Bordon

Van Wikipedia
Gank nao: navigatie, zeuke

Dit artikel is gesjreve in 't Gelaens. 't Weurt gewaardeerd óm in dit artikel 't Gelaens aan te hauwe of aan te gaeve welk anger dialek gebroek is.


Harry Bordon (Venlo, 14 september 1921 - Amsterdam, 3 november 1980) is veurnamelik bekènd es zanger, mèr haet tiedes zien laeve völ anger baantjes gehad.

Hae woonde ónger angere in Mesjtreech en Gelaen en waas van oarsjpróng bekkesjleërling. Pès nao de Tweëde Waereldaorlog wirkde Harry es bekkesjknech en in de biej de bèkkerie beheuërende lunchroom aan de Riekswaeg in Gelaen. Hae trooj toen al mènnig maol op in de zaak. Hae woort door de Duutsjers aangeweze óm in Duutjslandj te gaon wirke, mèr ziene baas wis häöm es ónmisbaar hiejvan vrie te kriege.

Nao de aorlog genaot hae in Remscheid (Duutsjlandj) 'n muzikaal opleiding, wómit hae cabaretier woort. Hae sjreef zien eige tekste. Mèt de Gelaense Dizyband trok hae door Limburg mèt zien sketches en leedjes. Hae waas 'ne sjnelle tekssjriever, 't bekènde 'Wie sjoeën ós Limburg is' zou tiedes de nachmès in 1949 zeen óntsjtaon. De meiste van Bordons leedjes zint in die periood gesjreve.

De zanger sjtapte euver nao 't Zuud-Nederlands Óntsjpanningsgezelsjap van Emile Feyten, dat mèt 'n revue-achtig program waekeliks oetverkochde zale trok. 't Orkes woort óngersjteund door 't Fonds voor Sociale Instellingen van de Sjtaatsmiene dat heël actief waas in 't organizere van óntsjpanning veur de doezende óngergrónjers en beambte.

Via Feyten, dae contacte hèj in Amsterdam, kaom Bordon in 1951 in de hoofsjtad terech wo hae ging optraeje es conferencier en zanger. Dao waas toen ouch Toon Hermans net aan zien carrière begoosj en hèje revues, zoa-es die van Snip en Snap, völ succes. Hae trouwde in Amsterdam mèt chansonnière Conny Renoir die al 'n kèndj haw oet 'n ieëder huwelik, Jenny Arean.

Bordons eësjte plate, Wie sjoeën en 't Kapelke van begin 1954 en kort daonao Marieke en 't Zude woorte oetgebrach door de Belsje platenmaatsjappie Omega, de opnames vónje waarsjienlik plaatsj in de sjtudio in Brussel. 't KRO-Amusementsorkes, 'ne 26-koppige groep ónger leiding van Klaas van Beeck, verzörgde de begeleiding. De plate woorte völ gedraejd biej de Limburgse Regionale Ómroop Zuid (ROZ), mèr veural in 't lanjelike program Arbeidsvitaminen mèt 't succes van Wie sjoeën ós Limburg is es gevolg.

Van de zanger zint mèr 16 leedjes op geluidsdrager bekènd. De letste jaore van zien laeve wirkde de zanger in Amsterdam.

Repertoire[bewirk | brontekst bewerken]

Ènnige van zien leedjes zint:

  • Wie sjoeën ós Limburg is
  • 't Kapelke
  • Daar waar een zoen een muulke is
  • Sjei oet!
  • Marieke
  • 't Zude
  • Es de weareld zoe vergoan
  • Do drinke wee ein elske op

Literatuur[bewirk | brontekst bewerken]

  • Ine Sijben en Jos Meuwissen, Wim Kuipers, Leo Hauben: 'Voorlopig zijn wij onder ons...' Euver dialek, identiteit en de Limburgse publieke ómroop (1945 - 2005), Remunj 2006

Brón[bewirk | brontekst bewerken]

  • Euvergezat oet Wikipedia NL.

Externe link[bewirk | brontekst bewerken]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Harry_Bordon&oldid=349247"