Haaksbergen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Haaksbergen in Euverijssel

Haaksbergen (Twents: Hoksebarge) is e dörp en 'n gemeinte in de Nederlandse provincie Euverijssel, in Twente, tege de grens mèt Duitsland (Noordrien-Wesfale) en Gelderland, mèt 'n oppervlak vaan 105,48 km² (daovaan 0,56 km² water) en (per 1 april 2016) 24.320 inwoeners. Neve de hoofplaots Haaksbergen, mèt circa 18.000 inwoeners, kint de gemeinte nog de kerne Boekelo, Brammelo, Buurse, Eppenzolder, Holthuizen, Honesch, Langelo, St. Isidorushoeve en Stepelo.

Historie

Haaksbergen moot roond 't jaor 800 oontstande zien aon de Buurserbeek. Me heet opgraovinge gedoon die aontuinde tot roond 't jaor 1000 hei e houte kèrkske stoont, op de plaots vaan de modern Sint-Pancratiuskèrk. In 1188 weurt de plaots veur 't iers geneump, es oonderdeil vaan 't bezit vaan de Graof vaan Dale. In de loup vaan d'n tied greujde Haaksbergen oet tot hoofplaots van 't glieknaomeg geriech, boe-oonder väöl kleinder dörper oet de umgeving vele. Roond 1400 verlagte en kanaliseerde ze de Buurserbeek, zoetot ze bevaorbaar woort en d'n IJssel binne bereik kaom. Zoe kós me euver water groete Hanzestei wie Zutphen, Deventer, Zwolle en Kampen bereike.

In de negentiende iew kaom de textielindustrie, groet in Twente, ouch hei op. Op e zeker memint wèrkde 80% vaan de beroopsbevolking in d'n textiel. Nao d'n oorlog zörgde dit daan ouch veur massa-oontslaoge en väöl sjomaasj.

Externe link

• Website vaan de gemeinte
• Dezelfde, in 't Twents