Gouvernemint (Nederlands Limburg)

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Gouvernemint aon de Maos.

't Gouvernemint (ouchwel gouvernemintsgebouw of provinciehoes) is e gebouw in Mestreech boe-in 't bestuur vaan de Nederlandse provincie Limbörg is gevesteg. 't Gebouw ligk op 'n eiland in de Maos ten zuie vaan Mestreech, vlakbij de John F. Kennedybrögk en de wieke Randwiek en Zjeramiek. In 't gebouw zetele de Provinciaol Staote, de Gedeputeerde Staote en de Gouverneur (eigelek de commissaris vaan de keuning(in)).

't Gouvernemint is oontworpe door arsjitektebureau Snelder en woort in 1986 door keuningin Beatrix geopend. In 1992 woort in 't gebouw 't Verdraag vaan Mestreech geteikend.

Historie[bewirk | brón bewèrke]

Al iewe is d'r 'n gouvernemint gevesteg in Mestreech. Lange tied waor 't Braobants gouvernemint (noe Spaons gouvernemint) gevesteg aon de Vriethof. 't Gouvernemint deende es residentie veur de Hertoge vaan Broabant, ein vaan de twie hiere vaan Mestreech en later dus ouch de keuning vaan Spanje dee ouch hertog vaan Braobant waor. Nao de euverheersing vaan de Franse in 1794 verdween de twiehieregheid en de functie vaan 't gouvernemint. Es Mestreech weer oonder Nederlands gezag kump, kump 't gouvernemint te ligke aon de Bouillonstraot. In 1935 weurt dat gebouw vervaange door 'n nui gebouw wat noe in 't bezit is vaan de Universiteit Mestreech. In 1986 verhuis 't gouvernemint oeteindelek nao Randwiek.