Godelieve van Gemen
Dit artikel is gesjreve (of begós) in 't Baolders. Laes hie wie v'r mit de versjillende saorte Limburgs ómgaon.
Godelieve Goedele van Gemen (geb. Bruijnen) is ein Nederlands-Limburgse dichteres. Zeej is gebaore in 1944 in Baolder, gemeinte Pieël en Maas.
Eure vader waar Frits Bruijnen, auteur van 't book: “Vader moet morgen komen“. Eur moder waar Maria Schobbers, zeej waar wèrkzaam as wiekverpleegster en TBC-consulente tösse 1934 en 1940.
Godelieve sjtudeerde Germaanse en Scandinavische Taal- en Letterkunde in Amsterdam beej ó.a. professor Nel Boer-Den Hoed en professor Minis. Zeej wèrkde as tolk, vertaler, tekssjriever, verhaoleverteller, natuurbesjermer (Werkgroep Anansi in 1988 en Werkgroep tot Behoud van de Duisternis 1990) en richde in 1992 Comité Watenstedt op. Versjeie jaore waar zeej vlöchtelingewerker en sjpraoklierares vur Baolderse kinger mit dyslexie.
Eur dochter Cosima maakde de illustraties beej de Nederlandssjpraokige kingerbeuk van Godelieve en beej 't Baolders ABC-book.
In 1995 sjreef zeej vur 't ieërs 'n verhaol in 't Baolders en wón daomei de twieëde pries van Veldeke. Daonao sjreef zeej regelmaotig in eur vaderssjpraok gedichter en verhaole ó.a. vur Veldgewas. In 2001 waar zeej de winnares van de Groeët Limbörgse Veldeke-literatuurpries de Veldekepries.
Zeej goof laezinge euver Scandinavische tale en de verwantsjap van hiel get Limbörgse wäörd mit Scandinavische wäörd. Sung 2011 is zeej ein ievrige dichteres vur Veldgewas, geredigeerd dór Wim Kuipers en Har Sniekers. Zeej sjrief hiel korte verhaole. Ouch Platbook kin op eur telle. In 2012 waar zeej same mit Paul Weelen en Marleen Schmitz genómmeneerd vur de Veldekepries. Godelieve Goedele pleit vur mieër literair publicaties in de ein of anger Limbörgse sjpraok mit daobeej zelfgemaakde vertalinge in 't Nederlands. Vurral vingk zeej det al ‘t gesjrevene dór de sjriever zelf mót waere ingesjpraoke.
Zeej sjreef in 't Nederlands vur ó.a. Jonas. Vur Katter sjrief zeej hiel korte verhaole in 't Nederlands. Daobeej sjrief zeej haiku's (oetgesjpraoke mit u van muur, gen oe van poes) en tanka's in bei de sjpraok. De Kattersjtökskes van de letste jaore nump zeej Rundjes Dreuvenisse. Ein deil van de gedichter is versjene, geïllustreerd en hankgedrök door Jan Klerken, van Acerpers mit lino’s van Paulien Klerken Rongen van Handwekpers.
Zeej haet gepubliceerd ónger versjeie pseudonieme.