Geel en roej kaart

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

De sjeidsrechter tuint 'ne speuler de geel kaart.

De geel en roej kaart zien in 't voetbal de hölpmiddele boemèt de sjeidsrechter 'ne speuler dudelek maak tot heer weurt gestraof. 'n Geel kaart weurt getrokke es woersjouwing, 'n roej kaart beteikent 'n oonmiddelleke oetsleting zoonder vervaanging (de speuler zie team moot daan mèt eine speuler minder wijer). Twie geel kaarte binne ein wèdstrijd beteikent ouch oetsleting; de sjeidsrechter tuint in dat geval iers de geel, daan de roej kaart.

In toernoje en competities kin me ouch weure oetgeslote es me mierder geel kaarte euver diverse wèdstrije vingk. In de Ieredevisie weurt 'n sjorsing opgelag nao vief geel kaarte, in de Champions League mis me nao twie kaarte otomatisch de volgende wèdstrijd. D'n trainer maag daan wel gewoen èlf speulers opstèlle, allein dee gesjorsde maag neet debij zien. Ouch op 'n roej kaart volg gemeinelek 'n sjorsing veur eine of mie volgende wèdstrije. De lui die dao-euver goon kinne dao allein vaan aofzien es de kaart achteraof oonterech is gegeve.

Criteria

Geel kaart

Geel kaarte kinne weure gegeve veur de volgende euvertrejjinge:

1. Oonsportief gedraag/speulbederf
2. Oongehuurzaomheid in woord of actie (beveurbeeld protestere bij de sjeidsrechter)
3. Aonhawwende euvertrejjing vaan de speulregele
4. 't Speul ophawwe es 't stèlligk (beveurbeeld 'ne keeper dee te laank wach mèt oettrappe)
5. Neet de zjuste aofstand in ach numme bij 'n speulhervatting
6. 't Veld zoonder touwstumming vaan de sjeidsrechter op koume
7. 't Veld zoonder touwstumming vaan de sjeidsrechter verlaote

In de praktijk weure geel kaarte veural gegeve veur criterium drei. Dèks geit 't um 'n actie die al-evel op de bal is geriech, meh boebij me toch de maan raak. Criterium 1 is door de jaore heer ouch opgerek. Zoe weurt 'n geel kaart allewijl ouch gegeve bij 'n schwalbe, en wienie de speuler zie shirt oettrèk (um 'ne goal te vere).

Roej kaart

De roej kaart weurt gegeve bij:

1. Irnsteg vojl speul
2. Gebruuk vaan geweld
3. Speie nao 'nen aander
4. De tegepartij 'n doelriepe kans oontzègke door de bal mèt de haand of erm aon te rake (oetgezunderd de keeper in zie penantiegebeed)
5. De tegepartij 'n doelriepe kans oontzègke door 't begoon vaan 'n euvertrejjing boe me 'ne vrije trap of penantie veur kin kriege
6. 't Gebruuk vaan sjamptaol of obsceen gebaore
7. Twie geel kaarte

Aon väöl vaan dees criteria zien wijer regele verboonde. Geval 1 kump dèks veur es 'ne speuler zienen tegestander raak zoonder intentie um de bal te speule, of es heer zoe oongecontroleerd inkump tot heer kin weite tot dat gevierlek is. Geval 2 geit euver geweld wat niks mèt 't speul te make heet (houwe, trampe es de bal neet in de buurt is). Veur geval 5 gelt es criterium tot d'n aonvallende speuler doorgebroke is; heer is veurbij de verdeidegingslinie op weeg nao de goal. Die euvertrejjing weurt dèks door keepers gemaak.

Historie

Geel en roej kaarte weure pas rillatief kort gebruuk. De meugelekheid um 'ne speuler vaan 't veld aof te sjikke had de sjeidsrechter al laank. Wie op 't WK vaan 1966 aon 'ne speuler neet kós weure dudelek gemaak tot heer draof mós, besloot me euver te goon op e kleuresysteem. Dit woort bij 't volgend WK, in 1970, veur 't iers in de praktijk gebrach.

Begin 2024 waor spraoke vaan de inveuring vaan 'n blauw kaart. Die zouw daan gegeve weure veur dinger wie speulbederf of commentair op de sjeidsrechter (boe noe 'n geel kaart op steit) en mote veure tot 'n tiedstraof. 'n Proef zouw in 't sezoen 2024/25 de lieger devisies in Ingeland mote beginne. In de VS weurt dat bij zaolvoetbal noe al gedoon.

Bron

Dit artikel baseert ziech op en:Fouls and misconduct (association football).