Frank Boeijen

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Frank Boeijen

Franciscus Johannes Maria (Frank) Boeijen (Nimwege, 27 november 1957) is 'ne Nimweegse, Nederlandstaolege popzenger. Zien groetste successe haolde heer in de jaore tachteg, es veurmaan vaan de Frank Boeijen Groep.

Bezètting Frank Boeijen Groep[bewirk | brón bewèrke]

De Frank Boeijen Groep bestoont oet

  • Frank Boeijen, zaank
  • Wil Theunissen, gitaar
  • Nels Busch, basgitaar
  • Henk Wanders, slaagwerk

Biografie[bewirk | brón bewèrke]

Boeijen woort gebore es joonkste in e Nijmeegs gezin vaan tien kinder. Zien breurs brachte häöm al vreug in aonraking mèt muziek vaan Bob Dylan en Neil Young, artieste die Boeijen later es invlode zouw neume. Op sjaol moch heer dèks veurzinge.

Nao zien sjaol begós heer gediechter en popmuziek te sjrieve. Aonvenkelek deeg heer dat lèste in 't Ingels, meh op aonraoje vaan Amerikaanse muzikante die heer trof begós in zien eige taol te zinge. In 1977 kump 'r in contak mèt Wout Pennings, mèt wee heer datzelfde jaor nog zien debuutplaot Frank Boeijen en Woutje Pennings opnump. 't Werk weurt neet opgemerk tot in 1978 plaotemaotsjappij CNR ziech demèt bemeujt: oonder rezjie vaan Rob de Nijs weurt de plaots, es Boeijen & Pennings en mèt veer nui leedsjes, obbenuits opgenome. De plaot weurt gei commercieel succes meh kump wel oonder de aondach vaan popleefhöbbers en krijg oonder aandere 'n recensie in OOR.

In 1979 hèlt Pennings demèt op. Same mèt de euvergebleve podiummuzikante (die Boeijen en Pennings bij concerte begeleide) en de nuie gitaris Wil Theunissen riech Boeijen in 1980 de Frank Boeijen Groep op. Hunnen debuutsingle vaan 't jaor dao-op, Verjaardagsfeest, weurt geplug door deejay Frits Spits en haolt de tipparaad. De naomloes debuutelpee datzelfde jaor deit evels niks. Nao nog twie kier tipparaad kump daan in mei 1983 d'n ierste hit: Linda. Wat hitsucces betröf steit de Frank Boeijen Groep in dees daog hendeg in de sjeem vaan de ander Nederlandstaolege bands Doe Maar en Het Goede Doel. Dat verandert in 1984: es 't dat jaor weer minder geit mèt de Nederlandstaolege popmuziek (dit is 't jaor boerin Doe Maar oeterein geit) haolt de Frank Boeijen Groep ziene groetste hit oets: Zwart wit. Dit protesleed tege 'ne racistische moord haolt de veerde plaots. 't Jaor dao-op, es 't nog väöl slechter geit in de Nederpop, kump Kronenburg park (euver 't Kronenburgerpark in 't Nijmeegs stadscentrum) op nómmer twelf. 't Zal 'ne klassieker weure die nog dèks op compilaties versjijnt en oonveranderlek op Boeijen zien concerte gespäöld weurt. Ouch in de res vaan de jaore tachteg is de Frank Boeijen Groep 'ne constante factor: edersjaor kump ein album oet, wat ummer in de albumparaad kump, en haos edersjaor ouch weurt wel 'ne (kleinen) hit gescoord. Later in de jaore tachteg stap de groop euver vaan de fieslocaties nao 't theater (op dat memint 'n unicum in Nederland), um oetindelek op allebei de locaties te goon speule. In 1991 meint Boeijen tot in artistiek opziech de rek droet is en hef heer de Frank Boeijen Groep op. Heer geit solo wijer. 't Leste optrejje is op 30 miert 1991 in Almere.

Datzelfde jaor nog kump heer mèt zien ierste nui album Wilde bloemen, boeveur heer 'ne nuie (begeleidings)band geformeerd heet. 't Ritme vaan ei nui album per jaor hèlt 'r neet vol, meh aon inspiratie liek 't 'm neet te oontbreke. De albums blieve de hitlieste steivas hole, wat evels neet vaan de singles kin weure gezag. Heer wèrk herhaoldelek same mèt de mies oetereinloupende artieste, boe-oonder Stef Bos, Henny Vrienten (vaan Doe Maar), Yasmine, Paskal Jakobsen (vaan Bløf) en Daniël Lohues (vaan Skik). Ouch liet heer touwnummend invlode oet wereldmuziek in zie werk touw. Slaagwèrker Norman Bonink verliet de band in 2001 um veur Bløf te goon drumme. In 2007 manifesteert heer ziech veur 't iers naodrökkelek es diechter, door de publicatie vaan 't book 36,9°C (boevaan de tekste op muziek zien gezat en es cd mèt de naom Fim do mundo bij 't book gelieverd zit). In 2008 kump 'ne theatertour mèt Henny Vrienten en Henk Hofstede (vaan The Nits), die ziech veur eine kier tot 'ne gelegeheidsband "Boeijen Hofstede Vrienten" vereinege en de cd Aardige jongens oetbringe.

Stijl[bewirk | brón bewèrke]

Frank Boeijen neump ziechzelf 't leefste singer-songwriter. Es belaankriekste inspiratie neump heer folkrockers vaan roond 1970 wie Bob Dylan, Neil Young, Leonard Cohen en Van Morisson. Door aandere is zien stijl ouch dèkser mèt Boudewijn de Groot en Herman van Veen vergeleke; soms weurt gesproke vaan "pop-chanson". Toch bevat ziene muziek, door 't gebruuk vaan de synthesizer en daovaan in 't verlèngde 't trökgriepe op de new wave, ouch invloede oet de mainstreampop vaan de jaore tachteg.

Boeijen heet door zoewel zien tekste es ziene muziek veural positief reacties oonder critici gewek. Trökkierende kritiek is evels tot heer slech articuleert en tot zien tekste te vaag zouwe zien.

Werk[bewirk | brón bewèrke]

Albums[bewirk | brón bewèrke]

Noteringe in de Nederlandse en eventueel Belzje albumparades

es Boeijen en Pennings
es Frank Boeijen Groep
solo of einmaoleg mèt aandere
verzaomelere
  • Onderweg (1988; 9)
  • Het mooiste & het beste (1997; 9, 25)
  • Toen & nu - De 50 mooiste liedjes (2004; 18)

Singles[bewirk | brón bewèrke]

Tot en mèt 1990 es Frank Boeijen Groep. Hitnoteringe in de Nederlandse Top 40 en de Vlaomse Ultratop 50 en zien veurgengers

  • Verjaardagsfeest (1981; tip)
  • Zo mooi (1982; tip)
  • Het antwoord (1983; tip)
  • Linda (1983; 28)
  • Doe iets (1983; 25)
  • Zwart wit (1984; 4, 28)
  • 1.000.000 sterren (1984; 29)
  • Kontakt (1984; tip)
  • Crime passionel (1985; tip)
  • Kronenburg park (Ga die wereld uit) (1985; 12)
  • Schaduw (1985; tip)
  • De beloning (1986; 24)
  • Verslaafd aan jou (1986; 34)
  • De verzoening (1987; 32)
  • Goudzoekers (1987; tip)
  • Welkom in Utopia 2 (1987; 18)
  • Winter in Hamburg (1987; tip)
  • Hier komt de storm (1988; tip)
  • Hoe verschrikkelijk ik ben (1988; tip)
  • Heimwee (1988; tip)
  • De wereld (1989; tip)
  • Zeg me dat het niet zo is (1990; 34)
  • Verjaardagsfeest (live) (1990; tip)
  • Koud in mijn hart (1991; tip)
  • Ze geeft om mij (1992; tip)
  • Paradijs (1993; 34)
  • De verleiding (1995; tip)
  • Eenvoudige man (1997; tip)
  • Suzanne (mèt Yasmine; 1999; [geinen hit in Nederland], 23)
  • Geen gevaar (met Pascal Jakobsen; 2002; tip)

DVD's[bewirk | brón bewèrke]

  • Schaduw van de Liefde (2003)
  • Live In Antwerpen (2004) mèt Il Novecento Orchestra
  • As (2006)

Beuk[bewirk | brón bewèrke]

Prieze[bewirk | brón bewèrke]

Bibliografie[bewirk | brón bewèrke]

  • Erik van den Berg, Roy Mantel, Pieter van Adrichem, Klare taal. 15 jaar Nederlandstalige rock. Groninge, 1994: pp. 48-57
  • Annette van der Mooren, Hans Walraven, Een lied van verlangen. Amsterdam, 1994

Extern links[bewirk | brón bewèrke]

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Frank_Boeijen&oldid=349134"