Deventer

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Deventer

Deventer (Nedersaksisch: Dèv'nter/Daeventer en in lokaal dialek: Dèmpter) is 'n stad en gemeinte in westelek Euverijssel, aon de reveer d'n Iesel. De gemeinte besleit 'n oppervlak vaan 134,38 km², boevaan 3,08 km² water en heet per 1 april 2016 99.166 inwoeners. De gemeinte umvat neve de stad Deventer, mèt good 80.000 inwoeners in 2015, de plaotse Apenhuizen, Averlo, Bathmen, Colmschate, Diepenveen, Dortherhoek, Lettele, Linde, Loo, Okkenbroek, Oude Molen, Pieriksmars, Schalkhaar, Tjoene en Zuidloo. Sommege vaan die zien mer gehöchte of stadswieke.

Stadsfuncties

Deventer verzörg e good deil vaan 't Salland en de oosteleke Veluwe meh is wel e secundair verzörgingscentrum mèt de groeter stei Zwolle en Apeldoorn in de beurt. Deventer is nog ummer mier op industrie es op deenste geriech.

In Deventer weurt jaorleks de groetste bokemerret vaan Nederland gehawwe.

Stadsgeziech

Deventer mèt de Groete Kèrk

Deventer heet ein vaan de bes bewoerde binnestei in Nederland. Bezeenswierdeg zien oonder mie de Groete Kèrk mèt häöre "Paeperbusse"-torie, de Waog en de nog gedeiltelek Roemaonse Bergkèrk. Wijer kint de stad talrieke hierehoezer, dèks geconcentreerd in sträötsjes mèt weineg of gein nuibouw. Vaan de singele is nog 't mins bewoerd gebleve.

Historie

In 768 woort Deventer gestiech door d'n Angelsaksischen evangelieprediker Sint-Lebuinus. In 956 kraog Deventer stadsrechte. Vaan de elfde tot de zestiende iew bleujde de stad op es handelsplaots, en lid vaan de Hanze. De bekinde theoloog Geert Groote waor oet Deventer aofkumsteg. Tösse 1559 en 1591 zetelde 'ne bisjop in Deventer, dee door de protestante verdraove woort. In 1783 kaom Deventer in de grip vaan de patriotte. In d'n Twiede Wereldoorlog woort Deventer zwoer gebombardeerd, meh hei bleef zjus 't stadscentrum gespaard.

Gebaore in Deventer

• Özcan Akyol, Nederlandstaolege sjriever
• Jules Croiset, acteur
• Bert van Marwijk, vootbaltrainer
• Jan Pieterszoon Sweelinck, componis

Extern linke

• http://www.deventer.nl/
• https://web.archive.org/web/20080412042222/http://www.vvvdeventer.nl/