De Percée

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Krusing vaan de Percée mèt de Wilhelminasingel.

De Percée is 'n benaoming veur e gedeilte vaan de Wiekerbrögkstraot of veur de Wiekerbrögkstraot en de Stationsstraot same in Wiek (Mestreech). De Percée löp vaan de Aw Brögk tot aon de Statie vaan Mestreech.

Historie

Kaart vaan Mestreech in 1775. Op de kaart is te zien tot aon de Wiekerkaant gein straot rechdoor geit en stop bij de Rechstraot.

Veur 1867 waor Mestreech 'n vestingstad. De statie waor daan ouch boete de mör gebouwd. 't Zouw de stadsmoer zwaak make es e spoor dweers dedoor zouw loupe. Meh me mós vaanwege de stadsmör (mèt mer twie stadspoorte) wied umloupe um bij de statie te koume. Me mós dus 'n doorbraak (op 't Frans: Percée) make um deze weeg korter te make. In 1865 begós me mèt 't slope vaan hoezer aon de Rechstraot. In 1866 maakde me e peurtsje door de stadsmoer nao de statie. Wie de stadsmör gesloop woorte (1867) en dus ouch 't statiepeurtsje (1868), kóste nui straote oontstoon. In 1881 lag me de Stationsstraot aon, daan nog mèt de Franse naom Percée beneump. Um dees nui straot te verbinde mèt de Aw Brögk woorte daonao in 1882 nog get hoezer aon straote oostelek vaan de Rechstraot gesloop en in 1888 volgde ouch 't oostelek deil vaan de Rechstraot. De gansen doorbraak en 't nui straotepatroen vaan Wiek kaom veerdeg in 1892. Aon de aonsletende Wilhelminasingel (dee 't tracé vaan d'n awwe stadsmoer volg) verreze pas in 1899 de ierste hoezer, de weskant vaan de stad had veurrang. Aon 't ind vaan de Percée kin me de statie vinde. De in 1853 gebouwde houte statie woort in 1915 vervaange door 'ne nuie statie.

De Percée allewijl

De Percée heet ziech, mèt de Rechstraot, oontwikkeld tot ein vaan de belaankriekste winkelstraote vaan Wiek. Oondaanks dat is de Percée wel bereikbaar veur verkier es oto's en fietsers. 't Breier gedeilte vaan de Percée, de Stationsstraot, weurt gebruuk es standplaots veur merrette, zoe wie de antiekmerret (edere zaoterdag) en de biologische produktemerret (ederen donderdag). Midde op de Percée steit ein vaan de bekinde stadsklokke. Dao weurt ouch edersjaor 'ne kemel opgehijs veur de vastelaovend es tegewiech veur 't Mooswief wat weurt opgehijs op de Vriethof. Wiek neump ziech daan ouch de Ke(e)melstad en zien ajdste vastelaovendvereniging neump me de Keemeleers (in Mestreech zien dit de Tempeleers).

Galerij

• 
  't Standbeeld De Wiekeneer, mesjiens wel 't bekinste beeld vaan Wiek.
• 
  De klok op de Stationsstraot.
• 
  De Percée (Wiekerbrögkstraot) mèt de vastelaovend.
• 
  Aajd warehoes Maussen oet 1932. Maussen waor ein vaan de modernste warehoezer in de stad; ze waore de ierste mèt 'nen tillefoon in Mestreech, ein vaan de wienege modernistische gebouwe in de stad mèt 't toen hiel modern tl-leech.