Cincinnati

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Cincinnati is 'n stad in 't zuudwèste vanne staot Ohio inne Vereinigdje Staote. Zie ligk ane reveer d'n Ohio. Inne gemèndje zelf wóndjen in 2020 zón 300.000 luuj, waat 't de op twieë nao grótste stad van Ohio maak. De ganse agglomeratie tèltj aevel bao 2 miljoen inwoonders.

De stad Cincinnati woort gestif in 1788 en in 1790 verneump nao 'n verein van ex-offesjeren oete Amerikaansen Ónaafhenkelikheidskrieg, die nao d'n aafloup vanne krieg trögkmóste nao häör börgerlaeve. Dit waas nao 't veurbeeldj vanne Romeinsen dictator Cincinnatus dae nao aafloup vanne kriegstrèkke van dem drek trögk achtere ploog góng staon.

Nao d'n aanlag van 't Eriekenaal woort de stad al drek e wichtig centrum vanne sjeepvaart oppe reveer d'n Ohio. In 1850 talj de stad al 115.000 inwoonders womit 't ein vanne grótste stej wèstelik vanne Appalacheberg waas.

Veure aafsjaffing vanne slavernie waas Cincinnati 'ne wichtige tössestaasje vanne Underground Railraod, woreuver de vriegekómme slave nao 't naorde vlöchdje.