Bursa (sjtad)

Van Wikipedia
Gank nao: navigatie, zeuke

Dit artikel is gesjreve in 't Heëlesj. 't Weurt gewaardeerd óm in dit artikel 't Heëlesj aan te hauwe of aan te gaeve welk anger dialek gebroek is.


Zich óp Bursa

Bursa (Greeks: Προύσα, Prusa) is 'n sjtad i Törkieë, neet wied va g'n Zieë va Marmara die Europa en Azië vaneenanger sjeid, óp 't Anatolisch sjiereiland. In 2016 houw ze 2.901.396 iwuënesj. Ze is doamit qua iwuënertal de veer noa groeëtste sjtad van 't lank. Alling Istanbul, Izmir en Ankara zint groeëter. De sjtad is vanaaf de twieëde haaf i d'r twintigste ieëw hel gegruid. Tussje 2011 en 2016 koame 1 mieljoeën lüj bei, meh de bevolkingsgrui numt sjtetig aaf.

Geografie[bewirk | brón bewèrke]

De sjtad Burda ligk nuëgetig kilometer zujelig van Istanbul en twintig à daartig kilometer va zieë, aa g'ne voot van 't Uludağ-gebirgde. 't Lanksjap i g'n umgeëving is greun. 't Guëf óch vulkanische activiteet i de vörm van inkel zjwavelkwelle.

Gesjichde[bewirk | brón bewèrke]

I de aodheed heesjde Bursa Prusa, zoeëwie ze in 't Greeks nog ummer heesj. D'r naamgeëver woar kuëning Proesia I. Cholos, deë óch sjtichter va g'n sjtad woar en heësjde uëver 't kuëninkriek Bythanië, 'n ouw landsjtrieëk tussje Istanbul en Bursa. De sjtad woar achtereevolges óngerdeel van 't Helleens Riek, Romeins Riek en 't Byzantiens Riek. Bursa koam in 1326 i heng va de Ottomane en woar bis de veroavering va Constantinopel (hüj Istanbul) in 1453 de hoofsjtad van 't Ottomaans Riek. Ze bleef evvel noa 't verlees va höar functie es hoofsjtad nog lank 't politiek en geestelig centrum van 't riek. Noa d'r Ieësjte Weltkreeg woeëd ze kót bezat durch Frankriek, en van 1920 bis 1922 durch Grekeland es reactie óp de genocide óp 't Greekse volk i Kling-Azië. In 1923 woeëd 't Verdraag va Lausanne getekend, woanoa de sjtad bei 't nui Törkieë woeëd gevoog.

Bekiekensweëd[bewirk | brón bewèrke]

De groeëte moskee

Vöal geboewer oet d'r Ottomaanse tied zint nog bewaard geblieëve. Bezónger boewwirke oet deë tied is beivuurbild 't graf va sultan Mehmed I en e aatal moskeeë, wie de Ulu camii (groeëte moskee), Yeșil camii (greun moskee), Hüdavendigarmoskee en de Orhan Gazi-moskee. De sjtad hat óch 'n synagoog, die bis 1975 deensdoog. Neet wied va g'n sjtad ligk e va de wichtigste winktersjportgebede va Törkieë: óp g'ne Uludağberg ligke sjkipistes.

Anger bezóngerhede:

  • 't Archeologisch museum
  • 't Dörp Cumalıkızık, mit hoezer oet d'r Osmaanse tied. Hüj is 't igerich es etnografisch museum en is 't ópgenoame es UNESCO-welterfgood
  • E theater vuur traditioneel Törks sjieëmsjpieële
  • E museum vuur Ottomaans kleierdrach
  • De Abdal-bruk oet 1677
  • De protestantse kirk
  • De natoerlige therme

Extern linke[bewirk | brón bewèrke]

Commons-logo.svg Commons: Bursa (sjtad) – Media gerelateerd aan dit óngerwerp
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bursa_(sjtad)&oldid=419756"