Broensems

Dit artikel is gesjreve (of begós) in 't Broensems. Laes hie wie v'r mit de versjillende saorte Limburgs ómgaon.

---

't Broensems of Broenssems is 'n Oos-Limburgs dialek dat gekald wurt in de Zuud-Limburgse sjtad en gemeinte Broenssem. I Broenssem kalle ze relatief minder plat wie in de res va Limburg, ónger angere vanweëge d'r invlood va de sjtaatskoel Emma-Hendrik.

Kenmerke

Mouillering

't Broenssems is ee va de zujelikste Limburgse dialekte waor sjprake is va mouillering bie selfsjtendige naamwuurd. Wuurd deë in 't Nederlandsj op -nd ènje, ènje in 't Broenssems op -ndj, bievuurbeeldj ‘kindj’ en ‘hóndj’. Dit is angesj wie zujelikere dialekte wie 't Heëldesj, waor me ‘kink’ en ‘hónk’ zeët. Ooch bie 't miervoud gieëf 't mouillering: ‘kinjer’ en ‘hunj’.

Naosjlaag

In 't Broenssems gieëf 't d'r klank eë: ènne e-klank mit naosjlaag. Aafhankelik van d'r sjpreëker kint de eë vervange were doer d'r klank ae.

Woerdebook

't Gieëf ooch 'n Broenssems woerdebook: ‘'t Woerdebook van Broenssem’, gesjreve doer Jeanne Bothmer-Herinx.