Bril
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
E loeriezer, 'ne bril, spikkeleerglazer of glaasouge is 'n optisch instermènt det drek veure ouge wuuertj gebroek en zörg det de drager daovan baeter zuutj.
E loeriezer haet 'ne lens de oug, ouch waal e glaas geneump.
Me óngersjèdj negatieve lenze, gemèndj veur baeter wiejeroet te kónne zeen en positieve lenzen, gemèndj veur baeter kórtbie te zeen.
't Ieëste loeriezer is döks e loeriezer veur wiedaaf baeter te kónne zeen. Me is biezeendj, det wil zègke det me kórtbie good kan zeen, meh wiedaad neet. Biezeendjheid wuuertj ouch myopie geneump.
Róndj 't veerenviefigste laevesjaor verluus 't oug 't vermoeage veur zich sjerp te stèlle, zoeadet 't kórtbie zeen lestiger wuuertj. Dit neump me wiedzeendj. Me is dan gebaatj bie e loeriezer mit positieve glazer, of 'ne laesbril. Wiedzeendjheid wuuertj ouch hypermetropie geneump.
In e glaas kan zowaal 'ne negatieve (baovenin) es 'ne positieve lens (óngerin) waere geslepe, zoeadet me veur 't kórtbie en 't wiedaaf zeen neet van loeriezer hoof te wussele. Dees saort aan glazer neump me bifocaal of multifocaal lenze.
Döks wuuertj 'ne bril ouch gebroek t'r besjurming vanne ouge. Zoea besjurmp 'ne zónnebril mit getntje glazer taengen euvervleujig zónleech of 'ne skibril taenge ultraviolet leech (t'r veurkómming van snieëblindjheid). 'ne Veiligheidsbril besjurmp de ouge taenge róndjvlegendje deilkes (beveurbeildj bie metaalbewirking) of taenge spatte van vleujstoffe (bie 't wirke mit sjemikalieje). Dukers gebroeken 'nen dukersbril zoeadet die häör ougen ónger 't water kónne geäöpendj haje. Al dees brilsaorte kónnen al dan neet mit lenze gemónteerdj waere.
Trivia
[bewirk | brón bewèrke]- Veure joeks neump me-n 't loeriezer owwel d'n uul.